తెలంగాణలో బంద్ కు జేఏసీ పిలుపు

Posted: 09/10/2014 12:00 AM IST

కాంట్రాక్టు ఉద్యోగుల రెగ్యులరైజేషన్ పై ఆందోళనలు ఉదృతం అవుతున్నాయి. రెగ్యులరైజ్ చేయాలన్న ప్రభుత్వ నిర్ణయాన్ని వ్యతిరేకిస్తూ తెలంగాణ యునివర్సిటీల్లోని విద్యార్థులు రెండు నెలలుగా నిరసనలు తెలుపుతున్నారు. కాంట్రాక్టు ఉద్యోగుల రెగ్యులరైజేషన్ వల్ల తమకు ఉద్యోగాలు రాకుండా పోతాయని విద్యార్థులు ఆవేదన వ్యక్తం చేస్తున్నారు. కేసీఆర్ ప్రభుత్వం విద్యార్థులకు వ్యతిరేకంగా వ్యవహరిస్తోందని ఆగ్రహం వ్యక్తం చేస్తున్నారు. తెలంగాణ ప్రభుత్వ వైఖరిని ఖండిస్తూ.., రాష్ర్టంలో విద్యాసంస్థల బంద్ కు నిరుద్యోగ విద్యార్థి జేఏసీ పిలుపునిచ్చింది.

ఈ బంద్ పిలుపుకు ఏబీవీపీ, టీఎన్ఎస్ఎఫ్, ఎన్.ఎస్.యూ.ఐ. సహా ఇతర విద్యార్థి సంఘాలు మద్దతు ప్రకటించాయి. కాంట్రాక్టు ఉద్యోగులను రెగ్యులరైజ్ చేయటం వల్ల ఉద్యోగాల భర్తీ కోసం నోటిఫికేషన్లు విడుదల కావటం తక్కువ అవుతుందని విద్యార్థులు ఆరోపిస్తున్నారు. ఉన్న పోస్టులన్నీ కాంట్రాక్టు ఉద్యోగులతో నింపేస్తే తమకు ఎలా ఉద్యోగాలు వస్తాయని ప్రశ్నిస్తున్నారు. ఉమ్మడి రాష్ర్టంలో ఉద్యోగాల కోసం ఉద్యమించిన తాము.., ఇప్పుడు సొంత రాష్ర్టంలోనే ఉద్యోగాల కోసం మరోసారి ఉద్యమించాల్సిన దుస్థితి వచ్చిందని ఆవేదనగా చెప్తున్నారు. తెలంగాణ వస్తే ఉద్యోగాలు వచ్చి బ్రతుకులు మారుతాయి అనుకుంటే.., తమ పరిస్థితిలో ఏ మార్పు లేదనీ, పైపెచ్చు ఉద్యమం చేసినందుకు కేసులు బహుమతులుగా మిగిలాయని విద్యార్థులు మండిపడుతున్నారు.

కార్తిక్