బీజేపీ హయాంలో 4 కొత్త గవర్నర్ల పంట పండింది!

Posted: 08/26/2014 03:13 PM IST

అధికారంలోకి వచ్చిన అనంతరం ఎన్టీయే ప్రభుత్వం కాంగ్రెస్ పార్టీ ద్వారా ఎన్నుకోబడిన గవర్నర్లను ఒక్కొక్కరిగా తొలగించుకుంటూ వస్తున్న విషయం తెలిసిందే! వారి స్థానంలో తమ పార్టీలో వున్న సీనియర్ లీడర్లను గవర్నర్లుగా నియమించి.. తమ పార్టీని మరింత బలోపేతంగా మార్చుకునే దిశగా... ఇంకా పదవీకాలం వున్నప్పటికీ కాంగ్రెస్ గవర్నర్లను తమకు తామే స్వయంగా రాజీనామా చేసేలే బలవంతం చేసింది. ఏదైతేనేం.. ఈ విషయంలో బీజేపీ పార్టీ గెలిచిందన్న వాస్తవం మాత్రం నిజం! ఈ నేపథ్యంలో రాజీనామా చేసిన గవర్నర్ల స్థానాలను భర్తీ చేసే విషయంలో భాగంగా... బీజేపీ పార్టీ తరఫు నుంచి 4 సీనియర్ నాయకులను నియమిస్తున్నట్టు రాష్ట్రపతి ప్రణబ్ ముఖర్జీ ఆమోద ముద్ర వేశారు. అందులో.. తెలంగాణ రాష్ట్రానికి చెందిన బీజేపీ సీనియర్ నేత - కేంద్ర మాజీ మంత్రి సీహెచ్ విద్యాసాగర్ రావు మహారాష్ట్ర గవర్నర్ గానూ.. గోవా గవర్నర్ గా మృదుల సిన్హా, కర్నాటక గవర్నర్ గా వీఆర్ వాలా, రాజస్థాన్ గవర్నర్ గా కల్యాణ్ సింగ్ తదితరులు నియమితులయ్యారు.

ఇందులో ముఖ్యంగా మన తెలుగు నాయకుడైన విద్యాసాగర్ రావు విషయంలో మాత్రం కొంచెం విచిత్రం చోటుచేసుకుంది. ఇంకో విధంగా చెప్పుకోవాలంటే.. అది ఆయన అదృష్టంగా భావించుకోవాలి. ఎందుకంటే.. ఇప్పటివరకు మహారాష్ట్ర గవర్నర్ గా వున్న కె.శంకరనారాయణన్ ను మిజోరాం రాష్ట్ర గవర్నర్ గా బదిలీ చేస్తూ రాష్ట్రపతి భవన్ శనివారంరాత్రి ఆదేశాలు జారీ చేస్తే.. అందుకు ఆయన విముఖత వ్యక్తం చేశారు. ఈ నేపథ్యంలోనే ఆయన మహారాష్ట్ర గవర్నర్ పదవికి రాజీనామా చేశారు. దీంతో మహారాష్ట్రలో గవర్న్ సీటు ఖాళీ అయిన నేపథ్యంలో ఆ స్థానంలో సీహెచ్ విద్యాసాగరరావును నియమిస్తున్నట్టు మంగళవారం రాష్ట్రపతి భవన్ ఆదేశాలు జారీ చేసింది. విద్యాసాగర్ రావు గతంలో రెండు సార్లు ఎంపీగా ఎన్నికయ్యారు. ఒకసారి కేంద్ర సహాయమంత్రిగానూ, మూడు సార్లు ఎమ్మెల్యేగా ఎన్నికయ్యారు.