బాబుకు కేసీఆర్ ఓపెన్ ఛాలెంజ్!

Posted: 08/06/2014 03:12 PM IST

ఆంధ్ర, తెలంగాణ తెలుగు రాష్ట్రాలకు చెందిన ఇద్దరు ముఖ్యమంత్రులు ఏదో ఒక విధంగా ఒకరిమీద ఇంకొకరు వివాదాస్పద వ్యాఖ్యలు చేసుకోవడం రానురాను సహజంగా మారిపోయింది. నువ్వెంతా..? నువ్వెంతా..? అనుకుంటూ ఇద్దరు పోల్చుకోవడంలోనే కాలం గడిపేస్తున్నారు కానీ... చేతుల్లో మాత్రం ఏమి నిరూపించుకోలేకపోతున్నారు. ఈ విషయాలను పక్కనపెడితే.. తాజాగా తెలంగాణ సీఎం కేసీఆర్ ఈసారి కాస్త భిన్నంగా తనదైన శైలిలో చంద్రబాబుకు ‘‘దమ్మున్న సవాల్’’ను విసిరారు.

ప్రొఫెసర్ జయశంకర్ జయంతి ఉత్సవాల సందర్భంగా మాట్లాడిన కేసీఆర్... ‘‘దమ్ముంటే అభివృద్ధిలో ఏపీ ముఖ్యమంత్రి చంద్రబాబు తనతో పోటీకి దిగాలని’’ సంచలన వ్యాఖ్యలు చేశారు. అంతేకాదు.. హైదరాబాద్ లో వున్న సంస్థలన్నింటికీ తెలంగాణవారి పేర్లనే వాడుకుంటామని ఆయన పేర్కొన్నారు. తెలంగాణ రాష్ట్రంలో తమకు అవసరం లేని విగ్రహాలను, పేర్లను తొలగిస్తామని... వాటితో తమకు ఎటువంటి అవసరం వుందని ఆయన ప్రశ్నించారు. ఈ వ్యవహారంపై త్వరలోనే చర్యలు చేపడుతామని ఆయన స్పష్టం చేశారు.

ఇందులో భాగంగానే కేసీఆర్ ప్రసంగిస్తూ.. ‘‘తెలంగాణాలోని విద్యాలయాల్లో చట్టప్రకారం ఆంధ్రా విద్యార్థులకు 15 శాతం అడ్మిషన్లు ఇస్తామని’’ ఆయన తెలిపారు. అయితే తెలంగాణ విద్యార్థుల ఫీజు తాము కట్టుకుంటామని, ఆంధ్ర విద్యార్థుల ఫీజులను ఏపీ ప్రభుత్వమే కట్టుకోవాలని ఆయన మరోసారి గుర్తుచేశారు. తెలంగాణాలో కూడా గ్రీన్ హౌస్ ను ప్రోత్సహిస్తామని.. దానికి వచ్చే విద్యుత్ పై అదనపు ఛార్జీలను రద్దు చేయిస్తామని ఆయన హామీ ఇచ్చారు.

AS