భారతదేశం మొత్తం మీద కిక్కే ‘‘కిక్’’!

Posted: 08/04/2014 05:35 PM IST

బాలీవుడ్ కండల వీరుడు కథానాయకుడిగా నటించిన ‘‘కిక్’’ మూవీ ఇటీవలే విడుదలైన సంగతి తెలిసిందే! మొదట్లో ఈ సినిమా డివైడ్ టాక్ తెచ్చుకున్నప్పటికీ ప్రేక్షకులు మాత్రం ఈ సినిమా నిజంగానే కిక్కెక్కిస్తోందని చెప్పుకుంటున్నారు. యావత్తు బాలీవుడ్ పరిశ్రమకే సల్మాన్ ఖాన్ మాంచి ‘‘కిక్’’ ఇచ్చాడని సినీ ప్రముఖులు కూడా పేర్కొంటున్నారు. ఇంకో విషయం ఏమిటంటే.. సల్మాన్ ఖాన్ కెరీర్ లోనే ఈ సినిమా బ్లాక్ బస్టర్ హిట్ గా నమోదయ్యింది. ఇదివరకే 6 సినిమాలు 100 కోట్ల క్లబ్ లో చేరాయి కానీ... 200 కోట్ల క్లబ్ లో ఇంతవరకు ఏమూవీ చేరుకోలేదు. కానీ ఈ మూవీ మాత్రం కేవలం రెండు వారాల్లోనే భారత దేశంలో 197.70 కోట్లు సాధించి... 200 కోట్ల వైపు పయనాన్ని సాగిస్తోంది.

గతంలో అత్యుత్తమ కలెక్షన్లను సాధించిన ‘‘జబ్ తక్ హై జాన్’’, ‘‘దబాంగ్ 2’’ సాధించిన వసూళ్లను ‘‘కిక్’’ సినిమా తలదన్నేసింది. ప్రపంచం మొత్తం మీద ఏకంగా 5000 థియేటర్లలో రిలీజయి సరికొత్త రికార్డును సృష్టించిన ఈ కిక్.. ఇంతవరకు ఏ బాలీవుడ్ సినిమాను విడుదల చేయని దేశాల్లో కూడా విడుదలయి బాలీవుడ్ చరిత్రను తిరగరాసింది. యావత్తు ప్రపంచం మొత్తం ఈ మూవీ బాక్సాఫీస్ కలెక్షన్లు కేవలం రెండు వారాల్లోనే 313 కోట్లు వసూళ్లయ్యాయని లెక్కలు చెబుతున్నాయి. ఇదే వేగంతో ఈ సినిమా దూసుకుపోతే.. త్వరలోనే 400 కోట్ల క్లబ్ లో చేరడం ఖాయమని సినీ విశ్లేషకులు పేర్కొంటున్నారు. ‘‘జై హో’’ సినిమా బోల్తాపడినా... ‘‘కిక్’’తో మాత్రం సల్మాన్ దశ పూర్తిగా తిరిగిపోయిందని విశ్లేషకులు అభిప్రాయాన్ని వ్యక్తం చేస్తున్నారు.

AS