తెలంగాణ టీడీపీకి మరో షాక్.. సీనియర్ నేత గుడ్ బై.?

Posted: 08/17/2019 10:16 PM IST

తెలంగాణ టీడీపీకి మరో భారీ షాక్ తగలనుందా.? చంద్రబాబు తొలి పర్యాయం ముఖ్యమంత్రిగా బాధ్యతలను చేపట్టిన తరువాత మంత్రిగా బాద్యతలను చేపట్టి క్రీయాశీలక వ్యవహారాలను చక్కెబెట్టిన నాయకుడు త్వరలో చంద్రబాబుకు గుడ్ బై చెప్పనున్నారున్న వార్తలు ఇప్పుడు చర్చనీయాంశంగా మారాయి. తెలంగాణలోని ముఖ్యమైన టీడీపీ నేతలను తమ పార్టీలోకి ఆకర్షించుకున్న అధికార పార్టీ.. తమ పార్టీలోకి కలుపుకోవడంతో వారంతా ఇప్పుడు అధికార పార్టీలు నేతలయ్యారు.

రానున్న ఎన్నికల నాటికి తాము తెలంగాణలో బలోపేతం కావాలని, అధికారాన్ని కూడా అందుకోవాలని ఆశిస్తున్న బీజేపి పార్టీ కూడా పావులు కదుపుతోంది. తెలంగాణ టీడీపీ పార్టీ పొలిట్ బ్యూరో సభ్యుడు, మాజీ మంత్రి టి. దేవేందర్‌గౌడ్ త్వరలోనే పార్టీకి గుడ్‌బై చెప్పి బీజేపీలో చేరబోతున్నట్టు తెలుస్తోంది. ఆయతోపాటు తనయుడు వీరేందర్ గౌడ్ కూడా కమలం తీర్థం పుచ్చకోబోతున్నట్టు వార్తలు వినిపిస్తున్నాయి. బీజేపీ నేతలు ఇప్పటికే వారితో సంప్రదింపులు జరిపినట్టు సమాచారం.

దేవేందర్ గౌడ్ రాజ్యసభ సభ్యత్వం ఈ ఏడాది జూన్‌తో ముగిసింది. ఆ వెంటనే ఆయనను బీజేపీ నేతలు సంప్రదించారన్న ప్రచారం కూడా జరిగింది. అయితే, పార్టీలో చేరిక విషయంలో కొంత ఆలోచనలో పడ్డారని, ఈ విషయంలో నిర్ణయం తీసుకోవడానికి కొంత సమయం కావాలని అడిగినట్టు తెలుస్తోంది. టీడీపీని వీడుతున్నారంటూ వస్తున్న వార్తలపై వీరేందర్ గౌడ్ స్పందించారు. తమకు ప్రస్తుతానికైతే అటువంటి ఆలోచనేదీ లేదని స్పష్టం చేశారు.