విడదీసే హక్కు సోనియాకు ఎవరిచ్చారు ?

Posted: 10/02/2013 09:40 PM IST

వివాదస్పద ఆర్డినెన్స్ ను ఉపసంహరించుకున్న కేంద్రం టి నోట్ పై ఎందుకు వెనక్కి వెళ్లదని ఎపిఎన్జీఓ సంఘం అధ్యక్షులు అశోక్ బాబు ప్రశ్నించారు. ఒక వ్యక్తి చెబితే ఆర్డినెన్స్ ను ఉపసంహరించుకుంటారా అని పేర్కొన్నారు. రాష్ట్రాన్ని విడదీసే హక్కు సోనియాగాంధికి ఎవరిచ్చారని అశోక్ బాబు ప్రశ్నించారు. రెండో ఎస్సార్సీ వేస్తామంటేనే కాంగ్రెస్ ను రాష్ట్ర ప్రజలు గెలిపించారన్నారు. కృష్ణా జిల్లా హనుమాన్ జంక్షన్ లో జరిగిన రైతు మహా గర్జన సభలో అశోక్ బాబు ప్రసంగించారు. రైతు గర్జిస్తినే ఆ గర్జన ఢిల్లీకి వినబడుతుందని, రైతుల గురించి ఆలోచించే పరిస్థితి నేడు సమాజానికి తెలిసి వచ్చిందన్నారు. పాలు, నీళ్లలాగా ఉన్న ఆంధ్ర, తెలంగాణ వాదులను విడదీయడానికి వచ్చిన కలియుగ హంస కెసిఆర్ అని అశోక్ బాబు అన్నారు. తాము సమ్మె 15 వరకు పొడిగించగానే తెలంగాణ నోట్ వెనక్కి వెళ్లిందని, అంటే సమ్మెలో ఉన్నంత కాలం టి నోట్ రాదని తెలిపారు.

 

రాజీనామాలు చేయాల్సిందే..

రాష్ట్ర విభజన ప్రకటన నేపథ్యంలో ఎంపీలు రాజీనామా చేయాలని ఎపీఎన్జీఓలు, విద్యార్థులు ఉద్యమం ప్రారంభించడం జరిగిందని, ఆ రోజు నుండి ఈ రోజు వరకు ఉద్యమం కొనసాగిస్తున్నామన్నారు. తాము రాజీనామా చేసినా స్పీకర్ ఆమోదించడం లేదని కల్లబొల్లి మాటలు చెబుతున్నారని, ఒకవేళ రాజీనామాలు ఆమోదించకపోతే ప్రభుత్వం ఇచ్చిన వసతులన్ని వదిలి ప్రజల్లో కలిసిపోవాలని సూచించారు. వారు రాజీనామాలు చేయనిపక్షంలో వారి సంగతి నియోజకవర్గాల్లో తేలుస్తామని హెచ్చరించారు. వీరెవరికి భవిష్యత్ లో రాజకీయ సహకారం ఉండబోదని, మాకు సుమారు 20 లక్షల ఓట్లు ఉన్నాయని తెలిపారు.