బతుకమ్మ కు కొత్త అర్థం చెప్పిన కేసిఆర్ కూతురు కవిత

Posted: 09/24/2013 01:30 PM IST

తెలంగాణ ప్రాంత ప్రజలకు ప్రత్యేకమైన పండగ బతుకమ్మ. తెలంగాణ జీవన విధానంతో ముడిపడి ఉన్న పండగ బతుకమ్మ. తెలంగాణ ప్రజలు ఎంతో భక్తి శ్రద్దలతో బతుకమ్మ పండగను జరుపుకుంటారు. సెప్టెంబర్‌, అక్టోబర్‌ మాసాల చివర్న లేదా తొలి అమావాస్య దినాల్లో ఆశ్వయుజమాసంలో వస్తుంది ఈ పండగ. తార్కికత, హేతువు నిర్మితం కాని రోజుల్లో అన్ని పండగలకూ దేవుడు లేదా దేవత మూలాలు ఆపాదించుకున్నట్టే ఈ పండగకూ అనేక కథనాలు ప్రచారంలో ఉన్నాయి. ధర్మాంగదుడనే చోళరాజుకు, ఆయన భార్య సత్యవతికి నూరుగురు కొడుకులు కలిగారని, ఆ కొడుకులెవరూ బతికి బట్టకట్టలేదని, దాంతో రాజు లక్ష్మీదేవిని తనకు సంతానం కావాలని కోరితే ఆమె వరప్రసాదం వల్ల కూతురు జన్మించిందని, ఆ కూతురికే కలకాలం జీవించి ఉండేలా బతుకమ్మ (బతుకు+అమ్మ) పేరు పెట్టారని, ఆమె పేరిటే తెలంగాణ ఆడపడుచులు ఏటేటా 'బతుకమ్మ' ఆడుతున్నారని ప్రతీతి. ఇక గౌరీదేవి మహిషాసురుని నిర్మూలించే క్ర మంలో నిద్రలోకి జారుకున్నదని, మహర్షులు ఆమెను తొమ్మిది రోజుల అనంతరం నిద్రలోంచి మేల్కొలిపారని, అందువల్లే నవరాత్రుల పూజల సందర్భంగా 'బతుకమ్మ' ఆట ఆడుతారని మరో ప్రతీతి. జాగృతి అంటేనే బతుకమ్మ అని, ప్రపంచ వ్యాప్తంగా తెలంగాణ జీవన విధానాన్ని బతుకమ్మ ద్వారా వెలిగెత్తి చాటుతున్నామని జాగృతి అధ్యక్షురాలు కల్వకుంట్ల కవిత వ్యాఖ్యానించారు. బంగారు బతుకమ్మకు ప్రత్యేక స్థానం ఉందన్నారు. ఆంధ్రా పాలనలో తెలంగాణ సంస్కృతి, సాంప్రదాయాలు, జీవన విధానం ధ్వంసమయ్యాయని పేర్కొన్నారు. వాటిని పునర్ నిర్మించడమే జాగృతి లక్ష్యమని ఆమె చెప్పారు. తెలంగాణ బిడ్డల బంగారు భవిష్యత్ కోసం వనరులను రక్షించడం కోసం సుశిక్షితులైన సైనికులను తయారు చేశామని చెప్పారు. జాగృతి అనుబంధ సంస్థలను కూడా బలోపేతం చేస్తున్నామని తెలిపారు. సామాజిక పరిస్థితులను అంచనా వేస్తూ జాగృతి అన్ని విభాగాల కార్యకర్తలు చురుకుగా పని చేయాలని పిలుపునిచ్చారు.