హైదరాబాద్ పై జేసీ కామెంట్స్

Posted: 09/21/2013 06:17 PM IST

అనంతపురం జిల్లా కాంగ్రెస్ సీనియర్ ఎమ్మెల్యే, మాజీ మంత్రి జేసీ దివాకర్ రెడ్డి సంచలన వ్యాఖ్యలు చేశారు. అటు హై కమాండ్ ఇటు వైఎస్ పై దుమ్మెత్తిపోశారు. సీమాంధ్రలో గత కొన్నిరోజులుగా ఉద్యమాలు, ఆందోళనలు కొనసాగుతుంటుంటే.. మా ఇష్టం వచ్చినట్లు మేం చేస్తాం..మీ ఇష్టం వచ్చినట్లు మీరు చేసుకోండనే విధంగా హై కమాండ్ వ్యవహరిస్తోందని దుయ్యబట్టారు. ఐటీ హబ్ కేంద్రానికి రెండు లక్షల కోట్లు విడుదల చేయడం సరికాదని, దీనివల్ల సీమాంధ్ర ప్రజలు మరింత ఆగ్రహానికి గురయ్యే అవకాశం ఉందని ఆయన అభిప్రాయం వ్యక్తం చేశారు. హై కమాండ్ చేస్తున్న తీరు పట్ల రాజకీయాల నుండి తప్పుకునే పరిస్థితి వచ్చిందని, రాయల తెలంగాణపై హై కమాండ్ పునరాలోచించాలని ఆయన డిమాండ్ చేశారు. రాష్ట్రంలో మరో నాయకుడు ఎదగకుండా అణగదొక్కారని దివంగత వైఎస్ రాజశేఖరరెడ్డిపై జేసీ అక్కసు వెళ్లగక్కారు. మరో నేత ఎదగకుండా చేసిన ఖ్యాతి ఆయనకు దక్కుతుందని, దీని ఫలితంగానే మాకు ఈ దుస్థితి దాపురించిందని ఆయన పేర్కొన్నారు.