పెళ్లి సాక్షిగా బయటపడిన అన్నదమ్ముల వార్

Posted: 08/21/2013 05:49 PM IST

నందమూరి బాలకృష్ణ తనయ తేజస్విని పెళ్లికి రాజ్యసభ సభ్యుడు నందమూరి హరికృష్ణ, జూనియర్ ఎన్టీఆర్ కుటుంబం హాజరు కాలేదు. బాలయ్య కూతురు తేజస్విని వివాహం హైదరాబాదులోని హైటెక్స్‌లో అంగరంగ వైభవంగా జరిగిన విషయం తెలిసిందే. ఈ పెళ్లికి హరికృష్ణ, జూనియర్ ఎన్టీఆర్‌లు హాజరు కాలేదు. వారిద్దరు పెళ్లికి హాజరు కాకపోవడం ఇటు రాజకీయవర్గాల్లో, అటు సినీ పరిశ్రమలో చర్చనీయాంశమైంది. నందమూరి కుటుంబంలో విభేదాలు మరోసారి బయటపడ్డాయి. తమ కుటుంబం మధ్య ఎలాంటి విబేధాలు లేవని తామంతా ఒక్కటే అన్న సంకేతాలు ఇచ్చినా..... బాలకృష్ణ. తన చిన్న కుమార్తె తేజస్విని వివాహం వేదికగా అన్నదమ్ముల మధ్య విభేదాలు బహిర్గతం అయ్యాయి. బాలయ్య ఇంట శుభకార్యానికి ఆయన సోదరుడు, హరికృష్ణ, జూనియర్ ఎన్టీఆర్ హాజరు కాకపోవటం రాజకీయ వర్గాల్లోనూ, సినీ పరిశ్రమలోనూ చర్చనీయాంశమైంది.

 

మరోవైపు అసలు జూనియర్ ఎన్టీఆర్ కు వివాహ ఆహ్వానం అందలేదని గుసగుసలు వినిపిస్తున్నాయి. ఇందుకు జూనియర్ ఎన్టీఆర్,చంద్రబాబు నాయుడు తనయుడు లోకేష్ ల మధ్య ఏర్పడ్డ విభేదాల కారణంగానే ఎన్టీఆర్ కు పెళ్లిపిలుపు అందలేదన్న చర్చ జరుగుతోంది. జూనియర్ ఎన్టీఆర్ ను పెళ్లికి పిలవనందునే హరికృష్ణ కూడా ఈ వివాహా కార్యాక్రమానికి దూరంగా ఉన్నట్లు తెలుస్తోంది. తేజస్విని వివాహ వేడుకను జూనియర్ ఎన్టీఆర్ తన ఇంట్లో టీవీలో వీక్షించినట్లు సమాచారం. ఇక హరికృష్ణ, బాలకృష్ణల మధ్య విబేధాలు చోటు చేసుకున్న సంగతి బహిరంగ రహస్యమే. బాలకృష్ణ పెద్ద కుమార్తె బ్రహ్మణిని చంద్రబాబు కుమారుడు లోకేష్ వివాహం చేసుకున్న తర్వాత బాలయ్య, బాబుల దోస్తీ మరింత బలపడింది. బాలకృష్ణ పూర్తిగా చంద్రబాబుకు అనుకూలంగా వ్యవహరించడం హరికృష్ణ అసంతృప్తితో ఉన్నారు. మరోవైపు టీడీపీలో జూనియర్ ఎన్టీఆర్ కు ప్రాధాన్యత ఇవ్వని విషయంలో ఏర్పడిన విబేధాలు హరికృష్ణకు చంద్రబాబుకు మధ్య అంతరం పెంచాయి. తెలుగుదేశం పార్టీ పగ్గాలను చంద్రబాబు తన తనయుడు లోకేష్‌కు అప్పగించాలనే ప్రయత్నాలతోనే వారు వ్యతిరేకంగా వ్యవహరిస్తున్నట్లు ప్రచారం సాగుతోంది. అంతేకాకుండా సోదరుడు బాలయ్య భవిష్యత్తులో బావ నుండి పార్టీ బాధ్యతలు తీసుకొని ‘ముఖ్య’ పదవులను అధిష్టించడమో లేక తన అల్లుడు లోకేష్ కోసం ప్రయత్నాలు ముమ్మరం చేస్తున్నారనే ప్రచారం జరుగుతోంది.

 

మరోవైపు జూనియర్ ఎన్టీఆర్ కూడా లోకేష్ చేతికి పగ్గాలు పోతే పార్టీ తన చేతుల్లోకి రావడం కుదరదని భావించి పార్టీలో పట్టుకోసం ప్రయత్నించి విఫలమయ్యారు. ఆ మధ్యకాలంలో బాలయ్య,ఎన్టీఆర్ లు కొన్ని వేదికలపై కలిసి కనిపించినా, తదుపరి కాలంలో మళ్లీ అంతరం ఏర్పడింది. ఈ నేపథ్యంలో బాబాయ్, అబ్బాయ్‌ల మధ్య విభేదాలు వచ్చాయని అంటున్నారు. ఆ కారణంగానే జూనియర్ తన మావయ్య, బాబాయ్‌ల పైన అసంతృప్తితోనే ఉన్నారనే ప్రచారం జరిగింది. తెలంగాణకు అనుకూలంగా టిడిపి కచ్చితమైన స్టాండ్ తీసుకుంటే... వ్యక్తిగతమంటూ హరికృష్ణ నిన్న సమైక్యాంధ్రకు అనుకూలంగా బహిరంగ లేఖ విడుదల చేశారు. ఇప్పుడు బాలయ్య కూతురు పెళ్లికి దూరంగా ఉన్నారు. వీటన్నిటిని పరిశీలిస్తున్న రాజకీయ పరిశీలకులు హరికృష్ణ సీమాంధ్రలో పార్టీ పెట్టినా ఆశ్చర్యపోవాల్సిన అవసరం లేదంటున్నారు. ఏమైన పెళ్లి వేడుకలో హరిక్రిష్ణ , ఎన్టీఆర్ రాకపోవటం మంచి విషయం కాదని, సొంత సోదరుడు ఇంటిలో పెళ్లికి రాకపోవటం పై , నందమూరి కుటుంబం పై అనేక పుకార్లు షికార్లు చేస్తాయని నందమూరి తారక రామారావు అభిమానులు, సీనియర్ రాజకీయ నాయకులు అంటున్నారు. సొంత ఇంట్లో పెళ్లి రోజే శత్రువులుగా మారిన అన్నదమ్ములుగా తెలుగు ప్రజలు చెప్పుకుంటారనే మాటలు పెళ్లికి వచ్చిన అతిథుల మద్య వినిస్తున్నట్లు మీడియా వర్గాలు అంటున్నాయి.