తెలుగు మీడియాకు ఆజాద్ నుండి పిలుపు !

Posted: 07/28/2013 03:23 PM IST

తెలంగాణపై యుపిఎ సమన్వయ కమిటీ సమావేశం తేదీ మారినట్లు తెలుస్తోంది. ఈ నెల 29వ తేదీకి బదులు 31వ తేదీన యుపిఎ సమన్వయ కమిటీ సమావేశం జరుగుతుందని సమాచారం. తెలంగాణపై చర్చించడానికి యుపిఎ సమన్వయ కమిటీ సమావేశాన్ని ఏర్పాటు చేయాలని కాంగ్రెసు అధిష్టానం భావిస్తోంది. కేంద్రం నుండి తెలుగు మీడియాకు సడన్ గా పిలుపు రావడం ప్రాధాన్యం సంతరించుకుంది. ఈ మేరకు కేంద్ర ఆరోగ్య శాఖ మంత్రి, ఆంధ్రప్రదేశ్ కాంగ్రెస్ వ్యవహారాల మాజీ ఇన్ చార్జి గులాంనబీ ఆజాద్ నివాసం నుంచి తెలుగు మీడియా ప్రతినిధులకు పిలుపు వచ్చింది. తెలంగాణపై ఆయన కీలక ప్రకటన చేసే అవకాశముందని భావించిన మీడియా ప్రతినిధులు హడావుడిగా ఆజాద్ కార్యాలయానికి చేరుకున్నారు. ఆంధ్రప్రదేశ్ కు చెందిన పలువురు నాయకులు ఆజాద్ నివాసంలో ఉండడంతో ఊహాగానాలు జోరందుకున్నాయి. రాష్ట్ర విభజనపై సంప్రదింపులు పూర్తికావటంతో కాంగ్రెస్, యూపీఏ ప్రభుత్వం తన వైఖరిని వెల్లడించాల్సివుంది. ఈ నేపథ్యంలో ఆజాద్ ఏం చెబుతారోనన్న ఉత్కంఠ నెలకొంది. రాష్ట్ర విభజన విషయంలో ఇటీవలి వరకు కాంగ్రెసు ఆంధ్రప్రదేశ్ వ్యవహారాల ఇంచార్జీగా పనిచేసిన ఆజాద్ కూడా కీలక పాత్ర పోషిస్తున్నారు. అంతేకాక అజాద్ రాయల తెలంగాణకు అనుకూలంగా అభిప్రాయసేకరణ చేస్తున్నారని అంటున్నారు. దాని గురించి వివరణ ఇవ్వవచ్చన్న భావన కూడా వ్యక్తం అయింది. చివరికి అజాద్ ప్రెస్ మీట్ రద్దు కావడంతో మళ్ళీ సస్పెన్స్ కొనసాగుతూనే ఉంది.