సీమాంధ్ర నాయకుల ఉమ్మడి నిర్ణయం

Posted: 07/27/2013 11:54 AM IST

కాంగ్రెస్ కోర్ కమిటీలో రాష్ట్ర విభజన మీద తర్జన భర్జనలు జరుగుతున్న నేపథ్యంలో సీమాంధ్ర నాయకులు ఎ.పి.భవన్ లో సమావేశమై తమ తీర్మానాన్ని సోనియా గాంధీకి లేఖలో వివరించారు.  

ప్రభుత్వం ఏకపక్షంగా వ్యవహరించి రాష్ట్రాన్ని విభజించవద్దన్న తమ కోరికను విస్మరించినట్లయితే తామంతా కలిసి కఠిన మైన నిర్ణయాలను తీసుకోవలసి వస్తుందని సీమాంధ్ర నేతలు సమావేశంలో స్పష్టం చేసారు. 

రాష్ట్ర మంత్రులు, కేంద్ర మంత్రులు, పార్లమెంటు సభ్యులు సమావేశమై గంటన్నర సేపు చర్చించి చేసిన నిర్ణయాన్ని సోనియా గాంధీకి రాసిన లేఖలో పొందుపరుస్తూ ఆ లేఖను ఆమెకు అందజేసే బాధ్యతను, రాష్ట్రాన్ని విభజించవద్దని ఆమెకు నచ్చజెప్పే బాధ్యతను కేంద్రమంత్రులు కావూరి సాంబశివరావు, చిరంజీవి, పళ్ళంరాజులకు అప్పజెప్పారు. 

జవహార్ లాల్ నెహ్రూ ప్రధాన మంత్రిగా ఉన్న సమయంలో 1956 లో జరిగిన రాష్ట్రావతరణ దగ్గర్నుంచి అన్ని విషయాలను ఆ లేఖలో వివరిస్తూ, 1969 లో ఇందిరా గాంధీ కానీ ఆ తర్వాత రాజీవ్ గాంధీ కానీ రాష్ట్ర విభజనకు వ్యతిరేకంగా వ్యవహరించిన తీరును గుర్తుచేస్తూ, రాష్ట్రాన్ని ముక్కలు చేసిన అపఖ్యాతిని తలెకెత్తుకోవద్దని కోరారు.  తమని సంప్రదించకుండా తెలంగాణా మీద నిర్ణయం తీసుకున్నట్లయితే తామంతా కలిసి అందుకు వ్యతిరేకంగా పోరాడాల్సి వస్తుందని కూడా ఆ లేఖలో స్పష్టం చేసారు. 

అయితే ఇంకా ఏమీ తేలలేదని, అందరినీ సంప్రదించకుండా రాష్ట్ర విభజన ఎలా జరుగుతుందని మంత్రి శైలజానాథ్ అన్నారు.  ఒకవేళ అలాగే గనక నిర్ణయం జరిగితే ఎమ్మెల్యేలు ఎమ్మెల్సీలు అంతా కలిసి నిర్ణయం తీసుకుని దానికనుగుణంగా చెయ్యవలసిన కార్యకలాపాలను చేపడతామని అన్నారు.

-శ్రీజ