ప్రకటనలకు కొత్త ముఖాలు

Posted: 07/13/2013 03:24 PM IST

పార్లమెంటు సమావేశాలకు ముందే కొన్ని ఉన్నత స్థాయి సమావేశాలు జరుగుతాయని, అందులో తెలంగాణా అంశం ప్రముఖపాత్ర వహిస్తుందని అఖిల భారత కాంగ్రెస్ కమిటీ అధికార ప్రతినిధి జనార్దన్ ద్వివేది ఈరోజు ఢిల్లీలో అన్నారు. 

తెలంగాణా ఉద్యమ నేపథ్యంలో కాంగ్రెస్ పార్టీ లా మరే పార్టీకీ ఈ విధంగా తాత్సారం చేస్తూ వెళ్ళటం సాధ్యం కాకపోవును.  పార్టీ చెయ్యదలచుకుంటే ఆఘమేఘాల మీద పని అయిపోతుంది.  చెయ్యదలచుకోకపోతే కావలసినన్ని వంకలు- కమిటీలు, ఏకాభిప్రాయాలు, విధివిధానాలు, చట్ట సవరణలు, కోర్ కమిటీ, వర్కింగ్ కమిటీ ఇలా ఎన్నో. 

అయితే ఈ లోపులో బుజ్జగించేవాళ్ళు కూడా కావాలి కాబట్టి కొందరు విశ్వాసపాత్రులైన కేంద్ర మంత్రులు ఆ గురుతర బాధ్యతను తలకెత్తుకుంటారు. 

అలా ఆర్థిక మంత్రి చిదంబరం, ప్రస్తుత రాష్ట్రపతి ఆర్థిక మంత్రిగా ఉన్నప్పుడు, హోం మంత్రి సుశీల్ కుమార్ షిండే ల ద్వారా కాంగ్రెస్ అధినాయకత్వం కొన్ని ప్రకటనలు, కొన్ని వాగ్దానాలు చేయించింది.  గులామ్ నబి ఆజాద్ కొంతకాలం హడావిడి చేసారు.   ఆ తర్వాత దిగ్విజియ్ సింగ్ వచ్చి ఇంకేముంది అయిపోయింది ఇక తెలంగాణా ఇచ్చెయ్యటమే పట్టండి జోలె, ఈ లోపులో తీసుకోండి స్వీటు, చేసుకోండి మీ నోరు తీపి అంటూ చెప్పుకొచ్చారు.  మన రాష్ట్ర నాయకులంతా గబగబా దిగ్విజయ్ సింగ్ ని కలవటం వారి వారి గోడులన్నీ వెళ్ళబుచ్చటం జరిగింది.  ఎంతో సమర్థవంతంగా దిగ్విజయ్ సింగ్ కి నచ్చజెప్పి, ఆయన అన్నీ ఓపిగ్గా వింటే, చాలా బాగా ఆయన్ని బుట్టలో వేసామని మన నాయకులు వాళ్ళకి వాళ్ళే శభాష్ అని భుజం చరుచుకున్నారు.

తీరా చేస్తే నిన్న కోర్ కమిటీ తుస్సుమంది.  దానికోసం నాలుగు రోజులుగా కసరత్తు చేసి మరీ వెళ్ళారు రాష్ట్రంలో ని నాయకత్రయం.  కమిటీ ముందు భేటీ, తర్వాత భేటి, ఒకరోజు ఆగి మరీ భేటీ ఇలా భేటీల మీద భేటీలు జరిగాయి కానీ అవన్నీ దిగ్విజయ్ సింగ్ వరకే పరిమితమయ్యాయి.

ఇక ప్రకటనలు చెయ్యటానికి కొత్త ముఖం కావాలనుకుందేమో కాంగ్రెస్ పార్టీ తమ అధికార ప్రతినిధి జనార్దన్ ద్వివేది చేత ఆ ప్రకటన చేయించింది.  అయితే ఇక ఇప్పుడు చాలా మందికి అర్థమైపోయింది- మౌత్ పీస్ ఒకటే కానీ స్పీకర్లు వేరు వేరని.

-శ్రీజ