వీరిద్దరికి జైలు శిక్ష తప్పదా ?

Posted: 07/13/2013 08:11 AM IST

జగన్ అక్రమాస్తుల కేసుకు సంబంధించిన కేసులో మాజీ మంత్రులు ధర్మాన ప్రసాద రావు, సబితా ఇంద్రారెడ్డి లకు జైలు శిక్ష తప్పదా ? ఒక వేళ నేరం రుజువైతే వీరిద్దరు కూడా ఏడు నుండి పద్నాలుగు ఏళ్ళు జైలు శిక్ష అనుభవించాల్సిందేనని సీబీఐ పేర్కొంది. వాన్‌పిక్ భూముల కేటాయింపులో కేసులో అభియోగాలు ఎదుర్కొంటున్న ధర్మాన పై కేసు నమోదు చేశామని, అలాగే దాల్మియా సిమెంటు కంపెనీకి కడప జిల్లాలో 470 హెక్టార్ల సున్నపు రాతి నిక్షేపాల కేటాయింపు మొత్తం నిబంధనలకు విరుద్ధంగా జరిగిందని, ఒక కంపెనీ కోసం లీజులు తీసుకుని మరొక కంపెనీకి వాటి హక్కులను బదలాయించినందుకు సబితను నిందితురాలిగా చేర్చామని చెప్పింది సీబీఐ. అయితే వారు రాజీనామా సమయంలో మీడియాతో మాట్లాడిన విషయంపై మెమోలు వేయడంపై మాజీ మంత్రులు ధర్మాన ప్రసాదరావు, సబితా ఇంద్రారెడ్డి అభ్యంతరాలను సీబీఐ తోసిపుచ్చింది.

వారిద్దరు మంత్రులుగా పనిచేశారని, రాజకీ యంగాను, అధికార వర్గాల్లోనూ పలుకుబడి కలవారని ఈ నేపథ్యంలో వారు మాట్లాడిన మాటలు సాక్షుల్ని ప్రభావితం చేస్తాయన్న తన ఆందోళనను పునరుద్ఘాటించింది. ఈ వ్యవహారంలో నింధుతులుగా వీరిద్దరిని జ్యుడిషియల్ కస్టడీకి తీసుకోవాలని, నేరం రుజువైతే శిక్ష అనుభవించక తప్పదని పేర్కొంది. సీబీఐ దాఖలు చేసిన మెమోను కొట్టేయాలని కోర్టును కోరారు. ప్రజాప్రతినిధులుగా తాము ఎందుకు రాజీనామా చేశామో చెప్పాల్సిన బాధ్యత త మపై ఉందని అందుకే మీడియాతో మాట్లాడామని చెప్పారు. దానిపై సీబీఐ అర్థం లేని వాదనలను లేవనెత్తిందని ఆక్షేపిం చారు. దీనిపై వాదనలను కోర్టు 19వ తేదీకి వాయిదా వేసింది. మొత్తానికి ఈ వ్యవహారంలో సబిత, ధర్మానలకు జైలు జీవితం తప్పేలా కనబడటం లేదు.