30న ముహుర్తం పెట్టిన జానారెడ్డి

Posted: 06/18/2013 09:05 PM IST

ఇప్పటికే ముగ్గురు కాంగ్రెస్ మంత్రులు అధిష్టానానికి డెడ్ లైన్ పెట్టి, అవమానం భారంతో గులాబీ పార్టీలో చేరిన విషయం తెలిసిందే. మళ్లీ మరో ప్రత్యేక తెలంగాణ కోసం మరో డెడ్ లైన్ పెట్టడానికి ఈరోజు తెలంగాణ ముఖ్య నేతలు భేటీ అయ్యారు. ఈ భేటీ రాష్ట్రం పంచాయతీ రాజ్ శాఖ మంత్రి జానారెడ్డి ఆద్వర్యంలో జరిగినట్లు సమాచారం. ప్రత్యేక తెలంగాణ రాష్ట్రం తప్ప మరో ప్రత్యామ్నాయానికి ఒప్పుకునేదిలేదని మంత్రి జనారెడ్డి అన్నారు. నాంపల్లి ఎగ్జిబిషన్ గ్రౌండ్స్‌లో తెలంగాణ ప్రాంత కాంగ్రెస్ నేతలు సమావేశమయ్యారు. భేటీ ముగిసిన అనంతరం జానారెడ్డి మాట్లాడుతూ తెలంగాణ కోసం తాము పార్టీ అధిష్టానం, కేంద్రంపై ఒత్తిడి తీసుకు వస్తామని చెప్పారు. తెలంగాణ కోసం మరోసారి ఢిల్లీకి వెళ్తామని చెప్పారు. ఈ నెల 30 తేదిన ఎగ్జిబిషన్ గ్రౌండ్స్‌లో భారీ బహిరంగ సభ నిర్వహిస్తామని, తద్వారా తెలంగాణ రాష్ట్రం కాంగ్రెసు ద్వారానే సాధ్యమనే విషయాన్ని గ్రామగ్రామానికి తెలియజేస్తామని, తెలంగాణ కాంగ్రెసు మాత్రమే ఇవ్వగలుగుతుందని జానారెడ్డి చెప్పారు. త్వరలో తాము రాష్ట్ర పార్టీ వ్యవహారాల ఇంఛార్జ్ దిగ్విజయ్ సింగ్‌ను కలుస్తామని, దీనిపై మాట్లాడతామన్నారు. తెలంగాణ ప్రాంత నేతలమంతా రాష్ట్రం కోసం ఏకమయ్యామని చెప్పారు. ఈ నెల 30న ముహుర్తం పెట్టుకొని జానారెడ్డి ప్రకటన చేసినట్లు తెలుస్తోంది. ఒకవేళ అధిష్టానంతో చర్చలు విఫలం అయితే. మంత్రి జానారెడ్డి పార్టీ మారే అవకాశాలు కనిపిస్తున్నాయి. చివరి ఛాన్స్ గా ఢిల్లీ వెళ్లి కాంగ్రెస్‌ పెద్దలతో మంతనాలు జరపటానికి మంత్రి జానారెడ్డి సిద్దమైనట్లు సమాచారం. జానారెడ్డి పెట్టిన ముహుర్తం తో తెలంగాణ ప్రజలుకు తీపి కబురు ఉంటుందని తెలంగాణ నాయకులు అంటున్నారు. జానా రెడ్డీ తీపి కబురుతో వస్తాడో, చేదు కబురు చెబుతాడో వేచి చూద్దాం..