Posted: 02/14/2013 07:29 PM IST

అక్రమాస్తుల  కేసులో  వైఎస్సార్ కాంగ్రెస్ పార్టీ అధ్యక్షుడు జగన్మోహన్‌రెడ్డి రిమాండ్  పొడిగింపు పై సీబీఐ  కోర్టుకు  వివరణ ఇచ్చింది. అక్రమాస్తుల కేసులో అరస్టయి చంచల్‌గూడ జైల్లో ఉన్న వైఎస్సార్ కాంగ్రెస్ పార్టీ అధ్యక్షుడు జగన్మోహన్‌రెడ్డికి కోర్టు ఈనెల 27వరకు రిమాండ్ పొడిగించింది. జగన్ రిమాండ్ నాటితో పూర్తి కాగా నాంపల్లి సీబీఐ ప్రత్యేక కోర్టు వీడియో కాన్ఫరెన్స్ ద్వారా ఆయనను విచారణ జరిపి ఈ మేరకు ఆదేశాలు జారీ చేసింది. జగన్‌ను ఇంకెన్నాళ్లు జైల్లో ఉంచుతారని ఆయన తరఫు న్యాయవాదులు వాదించారు. దీంతో జగన్ కేసు పురోగతిపై పూర్తి వివరాలతో కూడిన మెమో దాఖలు చేయాలని సీబీఐని కోర్టు ఆదేశించింది. జగన్ కేసుకు సంబంధించి ఏడు అంశాలపై దర్యాప్తు పూర్తి అయ్యాక ఒకే చార్జీ షీటును తయారు చేసి కోర్టుకు దాఖలు చేస్తామని సీబీఐ తరఫు న్యాయవాదులు కోర్టుకు తెలిపారు.

జగన్‌కు బెయిల్ ఇస్తే కేసు దర్యాప్తును ప్రభావితం చేసే అవకాశం ఉందని, జగన్ జైల్లో ఉంటేనే కేసును స్వేచ్ఛగా విచారణ చేయగలుగుతామని సీబీఐ పేర్కొంది.  కాగా ఎమ్మార్ కేసులో నిందితులకు కోర్టు రిమాండ్ పొడిగించింది. ఈ కేసులో నిందితులుగా ఉన్న నిమ్మగడ్డ ప్రసాద్, మోపిదేవి వెంకటరమణ, గాలి జనార్దన్‌రెడ్డి, బ్రహ్మానందరెడ్డి, శ్రీనివాసరెడ్డి, ఆలీఖాన్, సునీల్‌రెడ్డిలకు కూడా ఈనెల 27 వరకు రిమాండ్ పొడిగిస్తూ నాంపల్లిలోని సీబీఐ కోర్టు ఉత్తర్వులు జారీ చేసింది. నిందితులను వీడియో కాన్ఫరెన్స్ ద్వారా న్యాయమూర్తి విచారించి తీర్పునిచ్చారు.