Posted: 02/10/2013 05:16 PM IST

టీడీపీ అధినేత చంద్రబాబు నాయుడు చేపట్టిన పాదయాత్ర గుంటూరు జిల్లాలో సాగుతుంది. ఈ పాదయాత్రలో చంద్రబాబు సమస్యలను తెలుసుకొని, ప్రభుత్వాన్ని నిలదీయాల్సింది పోయి, రాజకీయ కోణంలోనే ముందుకు సాగుతూ... వైయస్సార్ కాంగ్రెస్ పార్టీ పై తీవ్రమైన విమర్శలు చేస్తున్నారు. తాజాగా పాదయాత్రలో బాబు మాట్లాడుతూ వైయస్ జగన్ మోహన్ రెడ్డి అక్రమంగా సంపాదించి లోటస్ పాండులో సువిశాలమైన ఇల్లు కట్టుకున్నారని, మనుషులు నివసించడానికి అంత పెద్ద ఇల్లు అవసరం లేదని, ప్రజలసొమ్మును కొల్లగొట్టి అంత పెద్ద ఇల్లు కట్టాడు కానీ. ఇప్పుడు అందులో మనుషులు ఒక్కరిద్దరు తప్ప ఎవరూ ఉండటం లేదని, ఎంతో మురిపంగా కట్టుకున్న ఇంట్లో కాకుండా జైలు గోడల మధ్య నివసిస్తున్నాడని, ఆ డెబ్భై గదుల్లో దెయ్యాలు కాపురాలు చేస్తున్నాయని అన్నారు.

ఇక వైయస్ రాజశేఖర్ రెడ్డి హయాంలో వేలకోట్లు తన వారికి దారాదత్తం చేశారని అధికారంలోకి వస్తే వాటిని వెనక్కి రప్పిస్తానని అన్నారు. అవినీతిపై తాను చేస్తున్న పోరాటానికి యువత మద్దతు ఇవ్వాలని కోరారు.అదే సమయంలో పాదయాత్రకు తాను కోరికలతో రాలేదని, లోక కళ్యాణం కోసం వచ్చానని అన్నారు. దెయ్యాలు తిరుగుతున్నాయని అనడంలో ఆంతర్యం ఏమిటో తెలియదు.అలాగే షర్మిల పాదయాత్ర చేస్తున్నదన్న కారణమో, లేక బ్రదర్ అనిల్ క్రైస్తవ ఓటర్లను ఆకట్టుకుంటున్నారన్న అనుమానమో తెలియదు కాని బాబు మొత్తానికి వారినే టార్గెట్ చేసి పాదయాత్ర చేస్తున్నాడని ఆ పార్టీకి చెందిన నేతలు కొందరు అంటున్నారు.