Posted: 01/28/2013 04:24 PM IST

తెలుగు హీరోల మైండ్ సెట్ మారిపోతుంది?  హీరోలుగా వెండి తెరపై కనిపించిన వారే ఇప్పుడు  విలన్ గా మారిపోతున్నారు. అందరు హీరోలు అయితే  విలన్ ఎక్కడి నుంచి వస్తారు? అందుకే కొంతమంది హీరోలు  విలన్లుగా మారటానికి సిద్దంగా ఉన్నారని సమాచారం.  ఒకప్పుడు విలన్‌ వేషాలు వేస్తూ వచ్చిన అవకాశాన్ని సద్వినియోగం చేసుకుని హీరోలయినవాళ్లు మన టాలీవుడ్‌లో ఎందరో ఉన్నారు. ఇప్పటి యంగ్‌ జనరేషన్‌లో ప్రతి ఒక్కరూ హీరోలుగానే చేయాలనే లక్ష్యంతో ఇండస్ట్రీకి వస్తుంటారు. అందరూ హీరోలుగానే చేయాలంటే కుదరదు. ఒక్కోసారి బాడీ లాంగ్వేజ్‌ను బట్టి విలన్‌గా కూడా చేయాల్సి ఉంటుంది. గతంలో కృష్ణంరాజు, చిరంజీవి, మోహన్‌బాబు, గోపీచంద్‌ తదితరులు ఈ కోవకే వస్తారు. అయితే ఇప్పటి యంగ్‌ హీరోలు అవకాశం వస్తే విలన్లుగా చేయడానికి వెనకాడమంటున్నారు. ఒకప్పుడు హీరో సుమన్‌, సురేష్‌లు ఇప్పుడు విలన్‌ వేషాలు వేస్తున్నారు. ఇప్పటి యంగ్‌ హీరోలలో తారకరత్న ఇప్పటికే ‘అమరావతి’ చిత్రంలో విలన్‌గా నటించి నంది అవార్డును కూడా పొందారు. మళ్లీ హీరోగా చేస్తూనే అవకాశం ఉంటే తప్పకుండా విలన్‌గా చేస్తానంటున్నారు. రాజమౌళి, ప్రభాస్‌ కాంబినేషన్‌లో వస్తున్న ‘బాహుబలి’ చిత్రంలో రానా దగ్గుపాటి ప్రధాన విలన్‌గా చేస్తున్నట్లు వార్తలొస్తున్నాయి. దాదాపు అది ఖాయమైనట్లే కనిపిస్తోంది. ఇక హీరో సుమంత్‌ ఇప్పటిదాకా చేసిన చిత్రాలలో పెద్దగా విజయం సాధించిన చిత్రాలేమీ లేవు. కాగా ఇటీవల తన మనసులోని మాట బయటపెట్టారు.

విలన్‌గా అవకాశం వస్తే వదులుకోనని...ఎప్పటినుంచో చెయ్యాలని అనుకుంటున్నానని అన్నారు. అలాగే తేజ స్కూల్‌ నుంచి వచ్చిన హీరో నవదీప్‌కు ఇప్పటిదాకా హీరోగా బ్రేక్‌ ఇచ్చిన సినిమా ఏమీ లేదు. లేటెస్ట్‌గా జూ.ఎన్‌టిఆర్‌, శ్రీనువైట్ల కాంబినేషన్‌లో వస్తున్న ‘బాద్‌షా’లో విలన్‌గా చేస్తున్నాడు. మంచు మనోజ్‌ కూడా ‘ఊ కొడతారా ఉలిక్కిపడతారా’ చిత్రంలో విలన్‌ షేడ్స్‌లో ఉండే క్యారెక్టర్‌ను మెప్పించాడు. మిస్టర్‌ నూకయ్య చిత్రంలోని పాత్ర కూడా అలాగే ఉంటుంది. మనోజ్‌ను కూడా ప్రేక్షకులు ఆయన తండ్రి మోహన్‌బాబులా విలన్‌గా చూడాలనుకుంటున్నారు. అందుకు మనోజ్‌ కూడా సిద్ధంగానే ఉన్నాడు. సరైన కథ దొరికితే విలన్‌గా నటిస్తానంటున్నాడు. ఎలాగూ తెలుగులో విలన్ల కొరత బాగానే ఉంది. విలన్లు లేని కొరత తీరినట్లవుతుంది. అలాగే విలన్‌గా రాణిస్తూనే హీరోగా గుర్తింపు ఉన్న పాత్రలు చేయవచ్చు. ఒక్క సారి విలన్‌గా చేసినంత మాత్రాన విలన్‌గానే స్థిరపడిపోరు.  హీరోగా గుర్తింపు తెచ్చుకున్న  మన తెలుగు హీరోలు విలన్ గా అయిన మంచి స్థాయికి వెళ్లాలని కోరుకుందాం.