Posted: 11/24/2012 10:52 AM IST

మధ్యప్రదేశ్  వైద్యవిద్యాశాఖ మంత్రి  అనూప్ మిశ్రా  తన గురించి చాలా గొప్పగా  చెప్పుకొన్నారు.  తనను తాను ఖాదీ దుస్తుల్లో  ఉన్న  గూండాగా  అభివర్ణించుకున్నారు.  భింద్ జిల్లా ఇన్ ఛార్జీ మంత్రిగా  ఉన్న ఆయన లహార్ పట్టణంలోని ప్రభుత్వాసుపత్రిలో  జరిగిన ఒక కార్యక్రమంలో మాట్లాడారు.  అక్రమ మైనింగ్ లో పాలుపంచుకొంటున్న గనుల మాఫియాను, అధికారులను ఉద్దేశించి  హెచ్చరింకలు  చేస్తూ ఆయన ఈ వ్యాఖ్యాలు చేసినట్లు సమాచారం.  లహార్ లో తన ఆదేశాలు మాత్రమే  అమలవ్వాలని , ఇసుక మాఫియా, అధికారులు చెప్పేది కాదని మంత్రి పేర్కొన్నారు. ఆయన లహర్ కు వచ్చిన సందర్భంగా  మద్దతుదారులు గాల్లోకి కాల్పులు జరిపి స్వాగతం  పలికారు.  అనూవ్ గూండా వ్యాఖ్యాలపై లహర్  కాంగ్రెస్  ఎమ్మెల్యే  గోవింద్  సింగ్  మండిపడ్డారు.  వ్యక్తులపై  మంత్రి బహిరంగంగానే బెదిరింపులకు దిగారని, ఆయన్ను కేబినేట్  నుంచి తప్పించాలని  గవర్నర్  రామ్ నరేశ్  యాదవ్ ను కోరారు. అనూవ్ తరచూ వివాదాలకు కేంద్ర బిందువు అవుతుంటారు.