Posted: 06/26/2012 10:28 AM IST

స్వతంత్ర భారతదేశ చరిత్రలో ఇప్పటి వరకు జరిగిన జరిగిన 13 రాష్టప్రతి ఎన్నికల్లో 1969 నాటి ఎన్నిక తనకు చిరకాలం గుర్తుండి పోతుందని బిజెపి సీనియర్ నేత ఎల్‌కె అద్వానీ స్పష్టం చేశారు. 14వ రాష్టప్రతి ఎన్నిక జరుగుతున్న నేపథ్యంలో ఇంతకుముందు జరిగిన రాష్టప్రతి ఎన్నికలకు సంబంధిచి తన బ్లాగులో విశే్లషించారు. 1969లో అప్పటి ప్రధాని ఇందిరాగాంధీ తమ అభ్యర్థిగా నీలం సంజీవరెడ్డి పేరును ప్రతిపాదించారు. నామినేషన్ వేసిన తరువాత అంతరాత్మ ప్రబోధానుసారం ఓటు చేయవలసిందిగా ఇచ్చిన పిలుపుసంజీవరెడ్డి ఓటమికి దారితీసింది. ఇండిపెండెంటుగా పోటీ చేసిన వరాహగిరి వెంకటగిరి ఘన విజయం సాధించారు. సంజీవరెడ్డి పరాజయానికి ముందు, ఆ తరువాత అత్యంత ఉత్కంఠ భరితమైన రాజకీయ పరిణామాలు చోటుచేసుకున్నాయని అద్వానీ గుర్తుచేసుకున్నారు.

అధికార అభ్యర్థిగా ఓడిపోయిన సంజీవరెడ్డి ఎమర్జెన్సీ ముగిసిన తరువాత జరిగిన ఎన్నికల్లో లోక్‌సభకు జనతా పార్టీ అభ్యర్థిగా ఎన్నికై రాష్టప్రతిగా ఏకగ్రీవం అయిన విషయం బిజెపి సీనియర్ నేత అన్నారు. సంజీవరెడ్డి తప్పించి ఇప్పటివరకూ రాష్టప్రతి పదవికి ఏకగ్రీవ ఎన్నిక జరగలేదని ఆయన తెలిపారు. వాజపేయి ప్రధానిగా ఉన్నప్పుడు అప్పటి ప్రతిపక్ష నాయకురాలు సోనియాగాంధీతో సహా మిగిలిన రాజకీయ పార్టీలతో చర్చించి అబ్దుల్ కలామ్‌ను రాష్టప్రతి పోటీకి ఎంపిక చేశారు. అయితే వామపక్షాలు తమ అభ్యర్థిగా లక్ష్మీసైగల్‌ను దించటంతో పోటీ తప్పలేదు. యుపీఏ వ్యవహరించిన తీరు మూలంగానే రాష్టప్రతి ఎన్నిక ఏకగ్రీవంగా జరిగేందుకు వీలులేకుండా పోయిందని అద్వానీ విమర్శించారు. ఈ విషయంలో బిజెపిని తప్పు పట్టడం సరైంది కాదన్నారు. ప్రణబ్ ముఖర్జీ అభ్యర్థిత్వాన్ని ఖరారు చేసిన తరువాత ప్రధాని మన్మోహన్ సింగ్ తనకు ఫోన్ చేసినప్పుడు ఎంపికకు ముందు ప్రతిపక్షాలతో మాట్లాడి ఉంటే బాగుండేది కదా? అని ప్రశ్నించినట్లు ఆయన వెల్లడించారు. ప్రధాని మాట్లాడిన కొద్దిసేపటికి ప్రణబ్ ఫోన్ చేసి తన పేరు ఖరారైనట్లు చెప్పారే తప్పించి మద్దతు కోరలేదని అద్వానీ అన్నారు. తమకు తగినంత సంఖ్యాబలం ఉంది కాబట్టే రాష్టప్రతి ఎన్నికల్లో ప్రతిపక్షాల సాయం తీసుకోకుండా కాంగ్రెస్ ఏకపక్షంగా వ్యవహరిస్తోందని అద్వానీ దుయ్యబట్టారు.