ఆగస్టు 7న గగనయానానికి 'ఆకాశ ఎయిర్‌' రెడీ.! దశలవారీగా ఇతర ప్రాంతాలకు..

Posted: 07/23/2022 10:33 AM IST

Akasa air taking to skies for it s maiden flight from mumbai to ahmedabad on aug 7

విమాన సేవలు అందించేందుకు మరో కొత్త సంస్థ సిద్ధమైంది. దేశవ్యాప్తంగా విమాన సేవలు అందించేందుకు మర పక్షం రోజుల వ్యవధిలో ఈ సంస్ధ విమానయాన రంగంలో అరంగ్రేటం చేయనుంది. ప్రముఖ స్టాక్‌ మార్కెట్‌ మదుపరి రాకేశ్‌ ఝున్‌ఝున్‌వాలా మద్దతు ఉన్న 'ఆకాశ ఎయిర్‌' ఆగస్టు 7న తమ కార్యకలాపాలను ప్రారంభిస్తున్నట్లు ప్రకటించింది. తమ సంస్థ తొలి సర్వీసును ముంబయి-అహ్మదాబాద్‌ మధ్య నడపనున్నట్లు తెలిపింది. ఈ మేరకు ఇప్పటికే టికెట్‌ బుకింగ్‌లు ప్రారంభించినట్లు తెలిపింది.

విమానయాన రంగంలో దిగ్గజ పారిశ్రామికవేత్తలు అరంగ్రేటం చేసి.. తమతో కాదని.. తమ సర్వీసులను అమ్ముకోవడమో లేక తాత్కాలికంగా నిలిపివేయడమో చేస్తుండగా, ఆకాశ ఎయిర్ మాత్రం వాణిజ్య భవిష్యత్తును వెతుక్కుంటూ.. ఈ రంగంలోకి అడుగుపెట్టింది. ఇక ఆగస్టు 13 నుంచి బెంగళూరు-కొచ్చి మధ్య కూడా సేవలు ప్రారంభిస్తామని ఆకాశ ఎయిర్‌ ఓ ప్రకటనలో తెలిపింది. దీనికి కూడా టికెట్లు ఇప్పటి నుంచే బుక్‌ చేసుకోవచ్చని పేర్కొంది. రెండు బోయింగ్‌ 737 మ్యాక్స్‌ విమానాలతో తమ వాణిజ్య కార్యకలాపాలకు కంపెనీ శ్రీకారం చుట్టనుంది.

ఇప్పటికే ఒక విమానం భారత్‌కు చేరుకుంది. మరొకటి ఈ నెలాఖరు వరకు కంపెనీ చేతికి అందనుంది. దశలవారీగా ఇతర నగరాలకు కూడా తమ కార్యకలాపాలను విస్తరిస్తామని కంపెనీ సహ-వ్యవస్థాపకుడు, ముఖ్య కార్యనిర్వహణాధికారి ప్రవీణ్‌ అయ్యర్‌ తెలిపారు. ఈ ఏడాది ప్రతినెలా తమ కంపెనీకి రెండు కొత్త విమానాలు అందుతాయని పేర్కొన్నారు. విమానయాన నియంత్రణా సంస్థ డీజీసీఏ నుంచి ఈ నెల 7న ఆకాశ ఎయిర్‌ 'ఎయిర్‌ ఆపరేటర్‌ సర్టిఫికెట్‌' అందుకుంది. మొత్తం 72 మ్యాక్స్‌ విమానాల కోసం కంపెనీ గత ఏడాది నవంబరులో బోయింగ్‌తో కొనుగోలు ఒప్పందం కుదుర్చుకొంది.