కెఎఫ్సీపై పోలీసులకు మహిళ పిర్యాదు.. వచ్చి ఏం చేశారంటే..!

Posted: 04/25/2022 09:11 PM IST

I want my chicken woman calls police at kfc

పోలీసు ఉద్యోగం చేయడమంటే చాలాకష్టం. ఎప్పుడు ఏ విధులు పడతాయో తెలియదు.. ఎక్కడ ఏ నేరాలు జరుగుతాయో కూడా తెలియకుండానే.. అన్నింటికీ బాద్యలుగా కావాల్సివుంటుంది. అటు మీడియా, ఇటు ఉన్నతాధికారులు అడిగే ప్రశ్నలతో సతమతం కావడమే కాదు.. ఇంట్లోని కుటుంబసభ్యులకు కూడా కనీసం సమయం కేటాయించలేక ఇబ్బందులు పడాల్సివస్తుంది. ఇదిచాలదన్నట్లు రాజకీయ నాయకుల హుకుంల మధ్య అన్నింటినీ సర్ధుకుపోతూ విధులు నిర్వహిస్తూ బతుకులు ఈడవాల్సివస్తుంది. ఇక ఉన్నవాటికి తోడు ఆకతాయిల బెడద కూడా.

పోలీసులకు ఫోన్లు చేసి ఆటపట్టిస్తూ ఉండే వార్తలు కూడా నిత్యం చూస్తూనే ఉంటాము. ఇంకొందరు.. చిన్నచిన్న విషయాలకే పోలీసులకు ఫోన్ చేసి ఇబ్బంది పెడుతూ ఉంటారు. తాజాగా.. అమెరికాలో ఇలాంటి ఘటనే వెలుగులోకి వచ్చింది. కేఎఫ్సీకి వెళ్లిన ఓ మహిళ.. చికెన్ ముక్కలు తక్కువ ఇచ్చారని పోలీసులకు ఫోన్ చేయడం విశేషం..!అమెరికాలోని క్లీవ్ల్యాండ్లో ఇటీవలే జరిగింది ఈ ఘటన. ఓ మహిళ.. కేఎఫ్సీకి వెళ్లింది. 8 చికెన్ పీస్ల కోసం ఆర్డర్ ఇచ్చి.. డబ్బులు కట్టింది. కానీ తనకు నాలుగే చికెన్ పీస్లు రావడంతో కోపం తెచ్చుకుంది. వెంటనే 911కు ఫోన్ చేసింది. 'నాకు నాలుగు పీస్లే వచ్చాయి. నాకు నా చికెన్ మొత్తం కావాలి. మీరు సాయం చేయండి,' అని చెప్పుకొచ్చింది.

ఫోన్ ఎత్తిన వ్యక్తి ఒక్కసారిగా షాక్ అయ్యారు. కానీ ప్రశాంతంగా జవాబిచ్చారు. 'మీకు చికెన్ పీస్లు కావాలా? ఈ విషయంలో పోలీసులు ఏం చేయలేరు. ఇది క్రిమినల్ వ్యవహారం కాదు. ఈ విషయాన్ని మీరు పోలీసులతో కాకుండా.. కేఎఫ్సీ యాజమాన్యం దృష్టికి తీసుకెళ్లండి,' అని చెప్పుకొచ్చి ఫోన్ పెట్టేశారు. అయినప్పటికీ.. ఘటనాస్థలానికి ఓ పోలీసును పంపించారు. అనుకున్న విధంగానే.. ఈ వ్యవహారంలో ఆ పోలీసు ఏం చేయలేకపోయారు. ఈ ఘటన అనంతరం పోలీసు అధికారులు.. ప్రజలకు ఓ ప్రకటన జారీ చేశారు. "911కు అత్యవసరమైతేనే కాల్ చేయండి. చిన్న చిన్న విషయాల కోసం 911ను ఉపయోగించుకోకండి. మీకు సహాయం చేయడం కోసమే మేము ఇక్కడ ఉన్నాము. కానీ కేఎఫ్సీలో చికెన్ కావాలనేది మా పరిధిలోకి రాదు," అని ఆ ప్రకటనలో పేర్కొన్నారు.