కాణిపాకంలో కలకలం.. వరసిద్ది వినాయకుడి పాత రథచక్రాలకు నిప్పు

Posted: 01/27/2022 05:12 PM IST

ఆంధ్రప్రదేశ్ లో మరోమారు దారుణ ఘటన చోటు చేసుకుంది. దేశవ్యాప్తంగా ఎంతో ప్రసిద్ధిగాంచిన ప్రసిద్ద పుణ్యక్షేత్రం చిత్తూరు జిల్లాలోని కాణిపాకం వరసిద్ది వినాయక స్వామివారి దేవాలయంలో కలకలం రేగింది. రాష్ట్రంలో వరుసగా హిందూ దేవాలయాలకు చెందిన ఆలయాలపై జరుగుతున్న దాడుల మరోమారు వరసిద్ధి వినాయకుడి ఆలయంలో పునారావృతం అయ్యాయి. దేవాలయంలోని వినాయకుడికి చెందిన పాత రథ చక్రాలకు గుర్తు తెలియని దుండగులు నిప్పు పెట్టి దహనం చేశారు. ఈ ఘటనతో ఒక్కసారిగా స్థానికంగా కలకలం రేగింది. ఆలయంలోని స్వామి వారికి దేవాలయ కమిటీ కొత్త రథాన్ని తయారు చేయించింది.

దీంతో పాత రథ చక్రాలను గోశాల పక్కన నిల్వ ఉంచారు. ఈ విషయం తెలిసిన దుండగులు దేవాలయ ఆవరణలో వున్న పాత రథచక్రాలను నిప్పుపెట్టి దహనం చేశారు. ఈ ఘటనలో రథ చక్రాలు పూర్తిగా కాలిపోయి, బూడిదగా మారాయి. సమాచారం అందుకున్న వెంటనే అగ్నిమాపక సిబ్బంది వెంటనే అక్కడకు చేరుకున్నారు. అయితే అప్పటికే జరగాల్సిన దారుణం జరిగిపోయింది. ఈ ఘటనపై భక్తులు తీవ్ర ఆందోళన వ్యక్తం చేశారు. ఈ ఘాతుకానికి పాల్పడిన దుండగులను గుర్తించి, కఠినంగా శిక్షించాలని డిమాండ్ చేస్తున్నారు. విషయం తెలుసుకున్న పోలీసులు కాణిపాకం ఆలయానికి చేరకుని దర్యాప్తు చేస్తున్నారు. దుండగులను గుర్తించేందుకు స్థానికంగా వున్న సిసిటీవీ ఫూటేజీలను కూడా పరిశీలిస్తున్నారు.