ITEMVIDEOS: దీపావళి విషాదం: స్కూటర్ పై టపాసులు తీసుకెళ్తూ.. అంతలోనే..

Posted: 11/05/2021 04:05 PM IST

అనాదిగా అందరి జీవితాల్లోనూ వెలుగులు జిమ్మె ఆ దివ్వెల పండుగ ఆ కుటుంబంలో మాత్రం తీవ్ర విషాదాన్ని నింపింది. దీపావళి పండుగ రోజు అందిరిలా తమ కుటుంబం కూడా టపాసులు కాల్చాలని భావించిన కుటుంబ పెద్ద తన తనయుడితో పాటు వెళ్లి.. టపాసులు కొనుగోలు చేసుకుని తిరిగి ఇంటికి  వస్తుండగా, మార్గమధ్యంలో అతని స్కూటర్ పై తీసుకొస్తున్న టపాసులు పెలి ఆ కుటుంబంలో తీవ్ర విషాదం చోటు చేసుకుంది. ఈ ఘటన పుదుచ్చేరి లోని విల్లుపురం జిల్లాలో జరిగింది. అయితే మార్కెటకు వెళ్లినవారు విగతజీవుల్లా మారడంతో పోలీసులు ప్రాథమిక దర్యాప్తు చేశారు.

పోలీసుల ప్రాథమికంగా విల్లుపురం సమీపంలోని సీసీటీవీ పూటేజీలను పరిశీలించగా, అందులో తండ్రికొడుకులు ఇంటికి తిరుగు పయనం అవుతున్న క్రమంలో స్కూటర్ పైనే బాణాసంచా పేలుడు సంభవించిందని తెలిసింది. ఈ ఘటనలో తండ్రి కొడుకులు ఘటనాస్థలంలోనే మరణించగా, మరో ముగ్గురు సమీప వాహనదారులు తీవ్ర గాయాలపాలయ్యారు. కూనిమెడు గ్రామానికి చెందిన కలైనేషన్‌, తన కొడుకు ప్రదీప్‌తో కలసి టపాకాయలు కొనుగోలు చేసి స్కూటర్‌పై.. తన స్వగ్రామానికి వస్తున్నారు. ఈ క్రమంలో విల్లుపురం రహదారిపై ఒక్కసారిగా మంటలు చేలరేగాయి. ద్విచక్ర వాహనం పెద్ద ఎత్తున​ పేలిపోయి..  కలైనేషన్‌, ప్రదీప్‌లు అక్కడిక్కడే మృతి చెందారు.

ఈ ఘటనలో వీరితో పాటు మరో ముగ్గురు కూడా తీవ్రంగా గాయపడ్డారు. పేలుడు ధాటికి..  ఒక లారీతోపాటు, రెండు ద్విచక్రవాహనాలు తీవ్రంగా ధ్వంసమయ్యాయి. వెంటనే స్థానికులు క్షతగాత్రులను సమీపంలోని ఆసుపత్రికి తరలించారు. ఒ‍క గంటలో వస్తామని చెప్పిన భర్త.. కొడుకు చనిపోయారని తెలియడంతో.. వారి కుటుంబంలో తీవ్ర విషాదం నెలకొంది. కాగా,  పేలుడుకి గల కారణాలు తెలియాల్సిఉంది. ఈ మేరకు కేసు నమోదు చేసుకున్నపోలీసులు దర్యాప్తు చేపట్టారు.