అనారోగ్య కారణాలతో బెయిల్.. విద్యార్థులతో కబడ్డీ అడిన బీజేపి ఎంపి

Posted: 10/14/2021 04:35 PM IST

Out on bail on medical grounds bjp s pragya thakur plays kabaddi

వివాదాస్పద బీజేపీ ఎంపీ ప్ర‌జ్ఞా ఠాకూర్‌ కబడ్డీ ఆడారు. మ‌ధ్య‌ప్ర‌దేశ్ రాజ‌ధాని భోపాల్‌లోని కాళీమాత‌ దేవాలయం వ‌ద్ద ఆమె విద్యార్థులతో కలసి ఈ ఆట ఆడారు. ద‌స‌రా సంద‌ర్భంగా మొద‌ట గుడిలో పూజల్లో పాల్గొన్న ప్ర‌జ్ఞా ఠాకూర్‌ అనంత‌రం గుడి వ‌ద్ద మహిళలకు కబడ్డీ పోటీలు నిర్వ‌హిస్తుండడాన్ని చూశారు. ప్ర‌జ్ఞాను కూడా ఆడాల‌ని అమ్మాయిలూ కోరారు. దీంతో ఆమె క‌బ‌డ్డీ.. క‌బ‌డ్డీ అంటూ కూత పెడుతూ ఆడారు. ఇందుకు సంబంధించిన వీడియో సామాజిక మాధ్య‌మాల్లో వైర‌ల్ అవుతోంది. సరిగ్గా ఇంతకు ముందు రోజునే అమె నవరాత్రి ఉత్సవాల్లో భాగంగా అమె గార్బా నృత్యాన్ని కూడా చేశారు. ఆ వీడియో కూడా నెట్టింట్లో వైరల్ గా మారింది.

కాగా 2007 మాలెగావ్ పేలుళ్ల కేసులో విచారణను ఎదుర్కోంటున్న ఆమె.. తనకు దీర్ఘఅనారోగ్య సమస్యలు వున్నాయని, వాటి నేపథ్యంలో తాను వైద్య పరీక్షలు చేయించుకుం టున్నానని న్యాయస్థానానికి విన్నవించి బెయిల్‌పై బయటకు వచ్చిన విష‌యం తెలిసిందే. కాగా అటు గార్బా, ఇటు క‌బ‌డ్డీ ఆటలలో ఎలాంటి అనారోగ్య సమస్యలు అమెను వేదిస్తున్నట్లు కనిపించలేదని, అమెకు బెయిల్ ఎందుకు ఇచ్చారని నెటిజనులు మిశ్రమంగా స్పందిస్తున్నారు. న్యాయస్థానాల్లో అనారోగ్య సమస్యలు ఉన్నాయని చెప్పే నేతలు.. వీదుల్లో మాత్రం ఆటలు, డాన్సులు వేస్తూ ఎంజాయ్ చేస్తున్నా.. న్యాయస్థానానికి పట్టదా అని కామెంట్లు చేస్తున్నారు.

ఎన్నికల నేపథ్యంలో సానుభూతి ఓట్ల కోసం వీల్ చెయిర్ లో తిరిగిన నేతలు.. గెలిచిన తరువాత మాత్రం డాన్సులు, కబడ్డీ ఆటలు ఎలా అడుతున్నారో చూడండీ అంటూ నెటిజులు నెట్టింట్లో, సోషల్ మీడియాలో కామెంట్లు పెడుతున్నారు. ఇక అమె కబడ్డీ అడిన వీడియోను పోస్ట్ చేసిన కాంగ్రెస్ నేత బీవీ శ్రీ‌నివాస్ ఆమెను ఎద్దేవా చేస్తూ వ్యాఖ్య‌లు చేశారు. మాలేగావ్ పేలుళ్ల కేసులో వ్యక్తిగత విచారణ నుంచి అనారోగ్య సమస్యలు అని చెప్పిన బెయిల్ తెచ్చుకున్న బీజేపి ఎంపీ.. ఆటలు, డాన్సులు చేయడానికి మాత్రం ఎలాంటి సమస్యలు లేవని నిరూపించారు. జాతీయ ద‌ర్యాప్తు సంస్థ (ఎన్ఐఏ) ముందు ఆమె విచార‌ణ‌కు మ‌ళ్లీ ఎప్పుడు హాజ‌రు కావాల్సి ఉందని ప్ర‌శ్నించారు.