బంగాళాఖాతంలో భూకంపం... చెన్నైలో ప్రకంపనలు..

Posted: 08/24/2021 03:58 PM IST

బంగాళాఖాతంలో భూకంపం సంభవించింది. రిక్టర్ స్కేల్ పై దీని తీవ్రత 5.1గా నమోదైంది. ఈ క్రమంలో తమిళనాడు రాజధాని చెన్నైలో భూప్రకంపనలు చోటుచేసుకున్నాయి. భూకంపకేంద్రం చెన్నై నగరానికి తూర్పు-ఈశాన్య దిశలో 320 కిలోమీటర్ల దూరంలో ఉన్నట్టు గుర్తించారు. ఈ భూకంపానికి సంబంధించిన వివరాలను నేషనల్ ఇన్ స్టిట్యూట్ ఆఫ్ సీస్మాలజీ వెల్లడించింది.

ఇవాళ మధ్యాహ్నం 12.35 గంటల సమయంలో భూమికి 10 కిలోమీటర్ల లోతున భూమి కంపించిందని వివరించింది. ఏపీలోని కాకినాడకు దక్షిణ-ఆగ్నేయ దిశలో 296 కిలోమీటర్లు, రాజమండ్రికి దక్షిణ-ఆగ్నేయంగా 312 కిలోమీటర్ల దూరంలో ఈ భూకంప కేంద్రం ఉన్నట్టు నేషనల్ ఇన్ స్టిట్యూట్ ఆఫ్ సీస్మాలజీ తెలిపింది. ఇది అతి తీవ్ర స్థాయిలో నమోదైందని కూడా తెలిపారు.

దీని ప్రభావంతో చెన్నైలోని పలు ప్రాంతాల్లో ప్రజలు ఇళ్లు, ఆఫీసుల నుంచి బయటికి పరుగులు తీశారు. కాగా, ఈ భూకంప ప్రభావం నేపథ్యంలో ఎలాంటి సునామీ హెచ్చరికలు జారీ కాలేదు. అటు, ఏపీలోనూ పలు ప్రాంతాల్లో స్వల్పంగా భూమి కంపించినట్టు స్టేట్ డిజాస్టర్ మేనేజ్ మెంట్ సంస్థ వెల్లడించింది.