మే 25 నుంచి విమానయాన సేవల పునరుద్దరణ.. దశల వారీగా

Posted: 05/20/2020 04:42 PM IST

దేశీయ విమాన ప్రయాణాలకు కేంద్ర ప్రభుత్వం శుభవార్తను అందించింది. దేశీయంగా విమానయానాలు చేయదలిచే ప్రయాణికులకు పచ్చజెండా ఊపింది. దేశీమ విమానా సర్వీసులు వచ్చే వారం నుంచి ఎగురనున్నాయి. ఈ విషయంలో రాష్ట్రాలు తెలిపిన అభ్యంతరాలను పట్టించుకున్న కేంద్రం ఇన్నాళ్లు దేశీయ విమానయానాలకు కూడా కళ్లెం వేసింది. అయితే తాజాగా దేశీయ విమానయానానికి మాత్రం అనుమతినిచ్చింది. ఈ నెల 25 నుంచి దశల వారీగా సేవలు మొదలవుతాయని పౌర విమానయాన మంత్రిత్వ శాఖ మంత్రి హర్దీప్‌సింగ్‌ పూరీ వెల్లడించారు. ఇప్పటికే విమానయాన సంస్థలు, ఎయిర్‌పోర్టులకు సమాచారం అందించామని పేర్కొన్నారు.

కరోనా వైరస్‌ ముప్పుతో మార్చి చివర్లో దేశీయ, అంతర్జాతీయ విమాన ప్రయాణాలను కేంద్రం నిలిపివేసిన సంగతి తెలిసిందే. లాక్‌డౌన్‌ కాలంలో సరకు రవాణా, కొన్ని ప్రత్యేక సేవల విమానాలు మాత్రం నడిచాయి. ‘2020, మే 25 నుంచి దేశీయ విమాన ప్రయాణాలు ఆరంభమవుతాయి. దశల వారీగా సేవలు పుంజుకుంటాయి. అన్ని విమానాశ్రయాలు, సంస్థలకు సమాచారం అందించాం. సిద్ధంగా ఉండాలని సూచించాం. ప్రయాణికుల కదలికలు, జాగ్రత్తలకు సంబంధించిన మార్గదర్శకాలను మంత్రిత్వ శాఖ ప్రత్యేకంగా విడుదల చేస్తుంది’ అని హర్దీప్‌సింగ్‌ ట్వీట్‌ చేశారు.