హైదరాబాద్ లో మళ్లీ విజృంభిస్తోన్న కరోనా.. 24గంటల్లో 40 కేసులు

Posted: 05/15/2020 08:51 PM IST

Covid 19 update hyderabad reports 40 cororna cases in 24 hours

తెలంగాణలో కరోనా మహమ్మారి మళ్లీ బుసకొడుతోంది. ప్రభుత్వం, అరోగ్యశాఖ అధికారులు, వైద్యులు, హెల్త్ వర్కర్లు, శానిటేషన్ సిబ్బంది, పోలీసుల సమిష్టి కృషితో తగ్గిన కరోనా కేసులు మళ్లీ పెరుగుతున్నాయి. ఈ నెల ఆరంభంలో రాష్ట్రవ్యాప్తంగా తగ్గుముఖం పట్టిన కరోనా కేసులు మళ్లీ పంజావిసురుతున్నాయి, ఈ నెల 7 నుంచి క్రమంగా కరోనా పాజిటివ్ కేసుల సంఖ్య పెరుగుతూ వస్తోంది. అయితే రాష్ట్రంలో నమోదవుతున్న కేసులన్నీ గ్రేటర్ హైదరాబాద్ పరిధిలోనే నమోదు కావడం గమనార్హం. ఇక ఇక్కడ కూడా మార్కెట్ తో సంబందంతోనే కరోనా కేసులు వ్యాప్తిచెందడం మరో విశేషం. ఇప్పుడు వలస కూలీలకు అధికంగా వైరస్ సోకుతున్నట్లుగా అధికారులు గుర్తించారు.

శుక్రవారం నాడు విడుదల చేసిన రాష్ట్ర వైద్య ఆరోగ్యశాఖ హెల్త్ బులెటిన్‌ ప్రకారం.. ఒకే రోజులో మొత్తం 40 కరోనా కేసులు నమోదయ్యాయి. దీంతో మొత్తం రాష్ట్రంలో కరోనా కేసులు 1454కు చేరుకున్నాయి. కాగా ప్రస్తుతం రాష్ట్రంలో 461 యాక్టివ్ కేసులు ఉన్నాయి. కేవలం జీహెచ్ఎంసీ పరిధిలోనే 33 పాజిటివ్ కేసులను గుర్తించడం గమనార్హం. మరో ఏడుగురు వలస కూలీలకు కూడా కరోనా సోకింది. హైదరాబాద్లోని నాలుగు జోన్లలో తప్ప మరెక్కడా కొత్తగా కరోనా కేసులు లేవని బులెటిన్లో వివరించారు. గ్రేటర్ హైదరాబాద్ పై రాష్ట్ర ప్రభుత్వం కూడా ప్రత్యేక దృష్టి సారించింది. పాజిటివ్ కేసులు నమోదైన ప్రాంతాల్లో కట్టుదిట్టమైన చర్యలు తీసుకుంటుంది.

శుక్రవారం కరోనా నుంచి కోలుకొని 13 మంది డిశ్చార్జి అయ్యారు. ఇప్పటి వరకూ డిశ్చార్జి అయిన వారు 959 మందిగా వెల్లడించారు. పెద్ద సంఖ్యలో తెలంగాణకు వస్తున్న వలస కార్మికుల వల్ల అధికంగా కరోనా సోకుతోందని హెల్త్ బులెటిన్‌లో పేర్కొన్నారు. సిద్దిపేట్, మహబూబాబాద్, మంచిర్యాల్, భద్రాద్రి, వికారాబాద్, నల్గొండ, ఆసిఫాబాద్, ఖమ్మం, నిజామాబాద్, కరీంనగర్, సిరిసిల్ల, కామారెడ్డి, మహబూబ్ నగర్, మెదక్, భూపాలపల్లి, సంగారెడ్డి, నాగర్ కర్నూల్, ములుగు, పెద్దపల్లి, ఆదిలాబాద్, సూర్యాపేట, నారాయణపేట, వరంగల్ అర్బన్, జనగామ, గద్వాల, నిర్మల్ జిల్లాలో గత 14 రోజుల వ్యవధిలో ఒక్క కరోనా కేసు కూడా నమోదు కాలేదు.