కరోనా మరణమృదంగం: దేశంలో 50 దాటిన మరణాల సంఖ్య..

Posted: 04/02/2020 09:46 AM IST

Coronavirus in india confirmed cases above 1965 death toll raises to 50

యవత్ ప్రపంచవ్యాప్తంగా కరోనా వైరస్ కరాళ నృత్యం చేస్తోంది. వేలాది మంది ప్రజల ప్రాణాలను బలితీసుకుంటున్న ఈ మహమ్మారి మన దేశంలోనూ పంజా విసురుతోంది. ప్రారంభంలో మన దేశంలో గణనీయంగా అత్యంత తక్కువ సంఖ్యలో నమోదైన కేసులు.. దేశవ్యాప్తంగా లాక్ డౌన్ ప్రకటించిన తరువాత కూడా అధిక సంఖ్యలో పెరగడం తీవ్ర అందోళన రేకెత్తించే అంశం. దేశవ్యాప్తంగా ఈ వైరస్ తీవ్రత రోజురోజుకు పెరుగుతోంది. గురువారంనాటికి దేశంలో కరోనా బాధితుల సంఖ్య 1965కి చేరిందని కేంద్ర ఆరోగ్య మంత్రిత్వశాఖ వెల్లడించింది.

ఇక ఇప్పటివరకు దేశంలో ఏకంగా 50మందిని ప్రాణాలను కరోనా వైరస్ కబళించి వేసింది. కాగా, ప్రస్తుతం దేశవ్యాప్తంగా 1764మంది చికిత్స పొందుతున్నారని ప్రకటించింది. మరో 151 మంది కొవిడ్‌-19 నుంచి కోలుకున్నారని.. కోలుకున్నవారందరినీ అసుపత్రుల నుంచి డిశ్చార్జి చేశారని తెలిపింది. కాగా, మహారాష్ట్రలో కొవిడ్‌-19 తీవ్రత అధికంగా ఉంది. తాజాగా ఇక్కడ మృతుల సంఖ్య 13కు చేరగా మొత్తం పాజిటివ్‌ కేసుల సంఖ్య 335గా ఉంది. గుజరాత్లో కొవిడ్‌-19 మృతుల సంఖ్య ఆరుకు చేరింది. మధ్యప్రదేశ్‌లో వైరస్‌ తీవ్రత పెరిగింది. మరణాల సంఖ్య ఆరుకు చేరగా 99పాజిటివ్‌ కేసులు నమోదయ్యాయి.

పంజాబ్‌లో 46కేసులు నమోదుకాగా నలుగురు మరణించారు. కర్ణాటక, పశ్చిమబెంగాల్‌లో ముగ్గురు చొప్పున మరణించారు. దిల్లీలో కొవిడ్‌- 19 తీవ్రత కొనసాగుతోంది. ఇక్కడ మొత్తం కేసుల సంఖ్య 152కు చేరగా ఇద్దరు మరణించారు. కేసుల సంఖ్య మరింత పెరిగే అవకాశం ఉందని ప్రభుత్వం అంచనా వేస్తోంది. జమ్మూ కశ్మీర్‌లో కొవిడ్‌19 కారణంగా ఇద్దరు మరణించారు. కేరళలో కొవిడ్‌ తీవ్రత కొనసాగుతోంది. ఇప్పటికే ఇక్కడ 265కి పైగా పాజిటివ్‌ కేసులు నమోదుకాగా ఇద్దరు మరణించారు. ఉత్తర్‌ప్రదేశలో లో 113కేసులు నమోదు కాగా ఇద్దరు మరణించారు. ఆంధ్రప్రదేశ్‌, బిహార్‌, హిమాచల్‌ప్రదేశ్‌, తమిళనాడులో ఒకరుచొప్పున మరణించారని ప్రభుత్వం వెల్లడించింది.