వడదెబ్బకు విదేశీ నటుడు మృతి.. గచ్చిబౌలిలో ఘటన..

Posted: 05/16/2019 01:33 PM IST

Sye raa actor dies due to sunstroke in hyderabad

నగరంలో ఎండల ఎలా ఠారెత్తిస్తున్నాయో చెప్పడం కష్టమే. రాష్ట్రవ్యాప్తంగా సూర్యుడి భగభగలకు ఎంతో మంది చనిపోగా, తాజాగా ఓ విదేశీ నటుడు కూడా సన్ స్ట్రోక్ బారిన పడి బలయ్యాడు. రష్యాకు చెందిన 38 ఏళ్ల నటుడు వడదెబ్బకు గురై మృతి చెందాడు. గచ్చిబౌలిలో అపస్మారక స్థితిలోకి జారుకున్న రష్యా నటుడ్ని గుర్తించిన సైబరాబాద్ పోలీసులు హుటాహుటిన అసుపత్రికి తరలించినా ఫలితం లేకపోయింది. అసుపత్రిలోనే ఆయన తన తుదిశ్వాసను విడిచాడు.

మృతుడికి చెందిన కెమెరాలో ఫొటోల ఆధారంగా ‘సైరా’ సినిమాలో సైడ్ ఆర్టిస్టుగా నటించినట్లు పోలీసులు గుర్తించారు. రష్యా దేశానికి చెందిన అలెగ్జాండర్ టూరిస్టు వీసాపై మార్చి నెలలో హైదరాబాద్‌కు వచ్చాడు. గచ్చిబౌలిలోని డీఎల్ఎఫ్ గేట్ నెంబర్ -1 వద్ద ఇతను అపస్మారకస్థితిలో పడి ఉన్నాడు. పోలీసులు కొండాపూర్ ఏరియా ఆస్పత్రికి తరలించారు. వైద్యుల సూచన ప్రకారం గాంధీ ఆస్పత్రిలో చేర్పించారు. అక్కడ చికిత్స పొందుతూ మే 14వ తేదీ మంగళవారం సాయంత్రం మృతి చెందినట్లు వైద్యులు వెల్లడించారు.

ఈ నెల 4, 5 తేదీల్లో ‘సైరా’ సినిమాలో సైడ్ ఆర్టిస్టుగా నటించాడని పోలీసులు గుర్తించారు. గచ్చిబౌలి సమీపంలోని ఓ హోటల్‌లో నివాసం ఉన్నాడు. మే 10వ తేదీన హోటల్ ఖాళీ చేశాడు. తర్వాత రోడ్లపైనే తిరిగాడని తెలుస్తోంది. వడదెబ్బ కారణంగానే అలెగ్జాండర్ మృతి చెందాడని పోలీసులు తెలిపారు. గోవాలో ఉండే అతని స్నేహితుడు బోరెజ్‌కు సమాచారం అందించామని, అతను వచ్చిన తర్వాతే పోస్టుమార్టం నిర్వహిస్తామని పోలీసులు పేర్కొన్నారు. పోలీసులు కేసు నమోదు చేసుకుని దర్యాప్తు చేపడుతున్నారు.