కొచ్చిన్ షిప్ యార్డులో పేలుడు.. విస్పోటనం ధాటికి 5గురు మృతి

Posted: 02/13/2018 01:16 PM IST

Five killed 11 injured after blast inside ship at cochin shipyard

కేరళలోని కొచ్చిన్‌ షిప్ యార్డులో ఘోర ప్రమాదం సంభివించింది. నౌకల నిర్మాణ కేంద్రంలో ఓ నౌకకు మరమ్మతులు చేస్తున్న క్రమంలో పేలుడు సంభవించింది. నౌకలో పేలుడు సంభవించి ఐదుగురు ప్రాణాలు కోల్పోయారు. మరో 15 మందికి పైగా గాయపడ్డారు. సమాచారం అందుకున్న పోలీసులు, అగ్నిమాపక దళాలు హుటాహుటిన ప్రమాదఘటనా స్థలానికి చేరుకుని క్షతగాత్రులను చికిత్స నిమిత్తం అసుపత్రికి తరలించారు. ఈ ప్రమాదవార్త తెలిసిన వెంటనే కేరళ ముఖ్యమంత్రి పినరయి విజయన్ తీవ్ర దిగ్భ్రాంతిని వ్యక్తం చేశారు.

ఈ ఘటనలో మృతుల కుటుంబాలకు తన ప్రగాఢ సానుభూతి వ్యక్తం చేశారు. సంబంధిత కొచ్చి షిప్ యార్డు అధికారులతో ఫోన్ లో సంబాషించిన ముఖ్యమంత్రి క్షతగాత్రులకు అత్యుత్వమ వైద్యసేవలను అందించాలని అదేశించానని తెలిపారు. అధికారులు తెలిపిన వివరాల ప్రకారం.. ఆయిల్‌ అండ్‌ నేచురల్‌ గ్యాస్‌ కార్పొరేషన్‌(ఓఎన్‌జీసీ)కి చెందిన సాగర్‌ భూషణ్‌ నౌకను మరమ్మతుల నిమిత్తం కొచ్చిన్‌ షిప్‌యార్డ్‌లో ఉంచారు.

కాగా, ఇవాళ అక్కడి సిబ్బంది మరమ్మతులు చేస్తుండగా.. ఒక్కసారిగా నౌకలో పేలుడు సంభవించింది. ఈ ఘటనలో ఐదుగురు వ్యక్తులు అక్కడికక్కడే మృతిచెందగా.. పలువురు గాయపడ్డారు. సమాచారమందుకున్న పోలీసులు, అగ్నిమాపక సిబ్బంది ఘటనాస్థలానికి చేరుకుని సహాయకచర్యలు చేపట్టారు. మృతుల్లో ఇద్దరు కేరళకు చెందినవారని తెలుస్తోంది. నౌకలో వాటర్‌ ట్యాంక్‌లో ఈ పేలుడు సంభవించినట్లు ప్రాథమిక సమాచారం. ఘటనపై పూర్తి వివరాలు తెలియాల్సి ఉంది.