మేడారం కోసం హెలికాఫ్టర్ సర్వీస్

Posted: 01/03/2018 03:45 PM IST

మేడారం జాతరను ప్రతిష్టాత్మకంగా నిర్వహించేందుకు తెలంగాణ ప్రభుత్వం నిర్ణయించుకుంది. జాతరకు సమయం దగ్గర పడుతుండటంతో పనుల్లో వేగం పెంచేసిన ప్రభుత్వం.. హస్తినలో ఆహ్వానాలు పంచుతోంది.

కేంద్ర మంత్రులతోపాటు మేడారం జాతరకు రావాల్సిందిగా ఉప రాష్ట్రపతి వెంకయ్యనాయుడుకి ప్రత్యేక ఆహ్వానం అందించింది. అలాగే, జాతరను జాతీయ పండుగగా ప్రకటించాలని కేంద్రాన్ని కోరినట్లు తెలంగాణ దేవాదాయ శాఖ మంత్రి ఇంద్రకరణ్ రెడ్డి తెలిపారు. ఇక ఈ సందర్భంగా హైదరాబాద్ నుంచి మేడారం వెళ్లే భక్తుల కోసం హెలికాప్టర్ సేవలను కూడా ప్రారంభించనున్నట్లు ఆయన ఢిల్లీలో మీడియాకు తెలిపారు. జనవరి 31 నుంచి ఫిబ్రవరి 3వ తేదీ వరకు బేగంపేట్,  వరంగల్ ఆర్ట్స్ కాలేజీ నుంచి ఆపరేట్ కానున్నాయి. మేడారం దగ్గర రెండు, లక్నవరం దగ్గర ఒక హెలిప్యాడ్ ను ఏర్పాటు చేయనున్నారు.  

ఇక ఈ నెల 21వ తేదీ నుంచి మేడారం సమ్మక్క సారలమ్మ జాతర ప్రారంభం కాబోతుంది. వివిధ రాష్ట్రాల నుంచి జాతరకు కోటి మంది భక్తులు వస్తారని అంచనా వేస్తున్నామని చెప్పారు. జాతర కోసం ప్రభుత్వం నుంచి రూ. 80 కోట్లను కేటాయించింది.