ఫేక్ రికార్డు.. పోలీస్ జాబ్ ఊడింది

Posted: 08/08/2017 08:38 AM IST

చేయని పనిని చేసినట్లు చూపించి అందరినీ మోసం చేసిన ఓ పోలీస్ జంటకు ఊహించని షాక్ ఎదురయ్యింది. వారిద్దరిని తక్షణమే విధుల్లోంచి తొలగిస్తున్నట్లు అధికారులు ప్రకటించారు. ఇంతకీ వారు చేసిన పనేంటంటే.. ఎవరెస్ట్ శిఖరాన్ని అధిరోహించినట్లు ఫేక్ రికార్డ్ క్రియేట్ చేయటమే.

పుణే శివాజీనగర్ పోలీస్ హెడ్ క్వార్టర్స్ లో పని చేసే దినేశ్ రాథోడ్ అతని భార్య తారకేశ్వరి రాథోడ్ లు గతేడాది జూన్ లో ఎవరెస్ట్ శిఖరాన్ని ఎక్కినట్లు ప్రకటించారు. అందుకు సంబంధించి కొన్ని ఫోటోల, కొంత సమాచారం ను కూడా కూడా నెట్ లో వైరల్ చేసింది. దీంతో మహారాష్ట్ర పోలీస్ శాఖ వారికి ఘనంగా సన్మానం కూడా చేసింది. అయితే ఆ ఫోటోలు చూసిన కొందరు స్థానిక పర్వతారోహకులు అనుమానం వ్యక్తం చేస్తూ నేపాల్ టూరిజం శాఖకు ఫిర్యాదు చేశారు. దీంతో అదంతా అబద్ధం అని తేలటంతో నేపాల్ ప్రభుత్వం వీరిద్దరిని తమ దేశంలోకి ప్రవేశించకుండా పదేళ్ల నిషేధం విధించింది.

ఆ వెంటనే రంగంలోకి దిగిన మహారాష్ట్ర పోలీసులు విచారణ ప్రారంభించగా, నవంబర్ లో వారిద్దరిపై సస్పెన్షన్ విధించారు. మూడు నెలల క్రితం విచారణ కమిటీ ముందు హాజరైన ఈ ఖాకీ దంపతులు తమను ఏ ఆధారాలతో సస్పెండ్ చేశారంటూ వాదించారు కూడా. అయితే విచారణలో వాళ్లు తప్పు చేసినట్లు రుజువు కావటంతో ఇప్పుడు విధుల నుంచి పూర్తిగా తొలగిస్తున్నట్లు పుణే అదనపు పోలీస్ కమిషనర్ సాహెబ్ రావ్ పాటిల్ వెల్లడించాడు.