తలసాని కుమార్తె వివాహ రిసెప్షన్ లో స్టార్ల సందడి

Posted: 11/14/2016 08:12 AM IST

తెలంగాణ రాష్ట్ర సినిమాటోగ్రఫీ శాఖ మంత్రి తలసాని శ్రీనివాస్ యాదవ్ కుమార్తె స్వాతి దీపక్ యాదవ్ వివాహ రిసెప్షన్ నోవాటెల్ హోటల్‌లో ఆదివారం రాత్రి ఘనంగా జరిగింది. ఈ కార్యక్రమానికి రాజకీయ నేతలతోసహా పలువురు సినీ స్టార్లు హాజరయి సందడి చేశారు.

అగ్రహీరోలు నందమూరి బాలకృష్ణ, మహేశ్‌బాబు, పవన్‌కళ్యాణ్ వధువరులను ఆశీర్వదించి, ఆపై ఫోటోలకు ఫోజులిస్తూ కార్యక్రమంలో సెంటర్ ఆఫ్ అట్రాక్షన్ గా నిలిచారు. ఇంకా ఈ కార్యక్రమానికి దర్శకరత్న దాసరి, హీరో కృష్ణంరాజు, అల్లు అరవింద్, అల్లు అర్జున్, అక్కినేని అఖిల్, మంచు విష్ణు, మంచు మనోజ్, గోపీచంద్ తదితరులు హాజరయ్యారు. ఆంధ్ర‌ప్రదేశ్ ఆర్థిక మంత్రి య‌న‌మ‌ల రామ‌కృష్ణుడు, ఎంపీ కొన‌గ‌ళ్ల నారాయ‌ణ‌, సీఎం ర‌మేష్ త‌దిత‌రులు పాల్గొని న‌వ‌వ‌ధూవ‌రుల్ని ఆశీర్వ‌దించారు.

కాగా, పశు సంవర్ధక, సినిమాటోగ్రఫీ శాఖల మంత్రి అయిన తలసాని శ్రీనివాస్‌ యాదవ్‌ కుమార్తె స్వాతి వివాహం రవికుమార్‌తో నవంబర్ 6న నిజాం కళాశాల మైదానంలో ఘనంగా జరిగిన విషయం తెలిసిందే. ఈ వేడుకకు తెలుగు రాష్ట్రాల గవర్నర్ నరసింహాన్, తెలంగాణ సీఎం కేసీఆర్, ఈనాడు గ్రూపుల అధినేత రామోజీరావు లతోపాటు ఏపీ నేతలు హాజరయ్యారు కూడా.