అప్ బహిష్కృత ఎమ్మెల్యేకు ఒక రోజు పోలీసు కస్టడీ

Posted: 09/04/2016 06:00 PM IST

ఢిల్లీకి చెందిన మాజీ అమాత్యుడు తనను బలవంతంగా లోబర్చుకుని తనపై లైంగిక దాడికి పాల్పడ్డాడని వీడియో టేప్ లోని మహిళ పిర్యాదు చేయడంతో అప్ బహిష్కృత నేత సందీప్ కుమార్ ను పోలీసులు అరెస్టు చేశారు. నీలి సిడీలు, మహిళలను లోబర్చుకున్నారన్న ఆరోపణలతో కష్టాల్లో ఇరుక్కున్న ఆమ్ ఆద్మీ పార్టీ బహిష్కృత నేత సందీప్ కుమార్ను కోర్టు ఒక రోజు పోలీసుల కస్టడీకి పంపించింది. సందీప్ను అరెస్టు చేసిన పోలీసులు ఆదివారం మధ్యాహ్నం ఢిల్లీలోని రోహిణిలోగల మేజిస్ట్రేట్ కోర్టులో హాజరుపరిచారు. ఒకరోజు తమకు రిమాండ్కు ఇవ్వాల్సిందిగా కోర్టు అనుమతి కోరారు.

ఇందుకు కోర్టు ఓకే చెప్పడంతో ఆయనను మరోసారి కస్టడీలోకి తీసుకున్నారు. రేషన్ కార్డు కోసం ఇంటికి వెళ్లిన మంత్రి తనకు మత్తుపానీయం ఇచ్చి స్పృహలో లేనప్పుడు లైంగికదాడికి ప్రయత్నించాడని, తనకు తెలియకుండా వీడియో తీశాడని ఉత్తర ఢిల్లీలోని సుల్తాన్ పురి పోలీస్ స్టేషన్లో ఓ మహిళ ఫిర్యాదు చేసిన విషయం తెలిసిందే. కాగా సందీప్ కుమార్ సహాయకుడిని పోలీసులు ఈ రోజు అరెస్టు చేశారు.

అభ్యంతరకర వీడియోలు లీక్ చేసి, సర్క్యులేట్ చేశాడన్న అభియోగంతో మాజీ మంత్రి, ఆప్ నుంచి ఉద్వాసనకు గురైన సందీప్ కుమార్ కార్యదర్శి ప్రవీణ్ కుమార్ ను ఢిల్లీ పోలీసులు అరెస్టు చేశారు. ఢిల్లీ సచివాలయం నుంచి ప్రవీణ్ కుమార్ ను పోలీసులు కొద్ది సేపటి కిందట అరెస్టు చేసి తీసుకువెళ్లారు. బహిష్కృత ఆప్ నేత సందీప్ కుమార్ అభ్యంతర కరంగా మహిళలతో కలిసి ఉన్న వీడియోను లీక్ చేశాడన్న అభియోగంలో ప్రవీణ్ కుమార్ ను అరెస్టు చేసినట్లు పోలీసులు తెలిపారు.