ITEMVIDEOS: పుల్లెల గోపీచంద్ పై టీ మంత్రి సంచలన వ్యాఖ్యలు

Posted: 08/22/2016 04:59 PM IST

ప్రశంసలు ఉన్నచోటే విమర్శలు పుట్టుక రావటం కామన్ గా మారిపోయింది. రియో ఒలంపిక్స్ రజత పతకం సాధించి వచ్చిన పీవీ సింధు వ్యవహారంలో కూడా ఇవి జరుగుతున్నాయి. సోమవారం మధ్యహ్నాం గచ్చిబౌలి స్టేడియంలో ఆమెకు తెలంగాణ ప్రభుత్వం ఘన సన్మానం చేసిన విషయం తెలిసిందే. ఈ సందర్భంగా డిప్యూటీ సీఎం మహమూద్ అలీ చేసిన వ్యాఖ్యలు వివాదాన్ని రాజేశాయి.
 
పీవీ సింధు విజయంలో కీలకపాత్ర పోషించిన గురువు పుల్లెల గోపీచంద్ ను అవమానించేలా ఆయన వ్యాఖ్యలు చేశారు. సన్మాన కార్యక్రమంలో అలీ మాట్లాడుతూ...  వచ్చే ఒలింపిక్స్‌లో సింధు గోల్డ్‌మెడల్‌ సాధించేందుకు గోపిచంద్‌ కంటే ఇంకా మంచి వ్యక్తితో కోచింగ్‌ ఇప్పిస్తామని పేర్కొన్నారు. ఇంతలో తిరిగి గొంతు సవరించుకుని... ఇప్పుడున్న కోచ్ మంచివాడేనని పేర్కొంటూ అవసరమైతే ఇంకా మెరుగైన కోచింగ్ ఆమెకు అందించేలా తెలంగాణ ప్రభుత్వం కృషి చేస్తుందని తెలిపాడు. ఆపై గోపీచంద్ అకాడమీ కోసం భూమి కేటాయించేందుకు సిద్ధంగా ఉన్నామంటూ కవర్ చేసే యత్నం చేశాడు.

ఏదేమైనా నోరు జారి అయిన చేసిన వ్యాఖ్యలపై ఇప్పుడు తీవ్ర దుమారం రేగుతోంది. తన గెలుపు వెనుక అసలు కృషి గోపీచందేనని సింధుతోపాటు, ఆమె తల్లిదండ్రులు పేర్కొన్న సంగతి తెలిసిందే. అభినంద సభలో ప్రభుత్వ గొప్పతనం చాటేందుకు, గోపీచంద్ ను అవమానించేలా ఇలాంటి వ్యాఖ్యలు చేయటం సరికాదని పలువురు వ్యాఖ్యానిస్తున్నారు.