చెర్రీ ప్లాన్ ఫలించింది.. విమానం ఎగిరింది..

Posted: 09/21/2015 11:02 AM IST

మెగాపవర్ స్టార్ రాంచరణ్ తేజ్ ఇండస్ట్రీలోనే కాకుండా వ్యాపారరంగంలోనూ సక్సెస్ ఫుల్ గా దూసుకెళ్తున్నాడు. చెర్రీ ఇప్పటికే ‘ట్రూజెట్’ విమానయాన రంగంలో భాగస్వామికగానే వుంటూనే.. దానికి బ్రాండ్ అంబాసిడర్ గా వ్యవహరిస్తున్న విషయం తెలిసిందే! ఈ విమాన సేవల్ని ఎంతో బాధ్యతగా నిర్వర్తిస్తున్న చెర్రీ.. ప్లాన్ ప్రకారమే విమానాలను రంగంలోకి దింపుతూ సక్సెస్ ఫుల్ గా కొనసాగిస్తున్నాడు. ఈ విమాన సేవలు నెమ్మదిగానే అయినా.. పక్కా ప్రణాళికతో విస్తరిస్తున్నాయి.

ఇప్పటికే ఈ విమాన సేవలు గోదావరి పుష్కరాల సందర్భంగా ప్రారంభమైన విషయం తెలిసిందే. హైదరాబాదు శివారులోని శంషాబాదు అంతర్జాతీయ విమానాశ్రయం నుంచి ఈ ఎయిర్ వేస్ సేవలను కేంద్ర పౌర విమానయాన శాఖ మంత్రి అశోకగజపతిరాజు ఆనాడు ప్రారంభించారు. ఇప్పుడు తాజాగా తాజాగా ట్రూజెట్ విమాన సేవలు విజయవాడ సమీపంలోని గన్నవరం విమానాశ్రయం నుంచి కూడా ప్రారంభమయ్యాయి. శంషాబాదు నుంచి గన్నవరం చేరుకున్న ట్రూజెట్ విమానం, తిరిగి హైదరాబాదుకు విజయవంతంగా తిరుగు ప్రయాణమైందని ఆ సంస్థ ఎండీ వంకాయలపాటి ఉమేశ్ ప్రకటించారు. ఈ నేపథ్యంలోనే ఆ సంస్థ యాజమాన్యం హర్షం వ్యక్తం చేసింది. విజయవంతంగా ప్రారంభమైన తమ విమాన సేవల్ని.. రాష్ట్రంలోని ఐదు ప్రధాన నగరాలకు త్వరలోనే తమ విస్తరిస్తామని ఉమేశ్ పేర్కొన్నారు.

ఇదిలావుండగా.. ట్రూజెట్ విమాన సేవలు విజయవంతంగా ప్రారంభమైన నేపథ్యంలో భవిష్యత్తులో దేశవ్యాప్తంగా విస్తరించాలని ఆ సంస్థ ఆలోచిస్తున్నట్లు వార్తలొస్తున్నాయి. గతంలో కూడా చెర్రీ ఈ విధంగా స్పందించాడు. తమ సేవలు సక్సెస్ ఫుల్ గా రన్ అయితే.. దేశవ్యాప్తంగా విస్తరిస్తామని ఓ ఇంటర్వ్యూ నేపథ్యంలో పేర్కొన్నాడు. ఏదేమైనా.. చెర్రీ తన టాలెంట్ ఇండస్ట్రీలోనే కాకుండా వ్యాపార రంగంలోనూ బాగానే నిరూపించుకుంటున్నాడని విశ్లేషకులు చెబుతున్నారు.