వ్యాపం స్కాంపై సీబిఐ విచారణకు అదేశించిన సుప్రీం..ఇప్పుడైనా నిజాలు వెలుగుచూసేనా..?

Posted: 07/09/2015 12:47 PM IST

Supreme court orders cbi probe into vyapam scam

మధ్యప్రదేశ్ లో వెలుగుచూసిన వ్యాపం కుంభకోణం దేశవ్యాప్తంగా సంచలనానికి తెరలేపిన నేపథ్యంలో ఈ కేసును సిబిఐ దర్యాప్తు చేయాలని అదేశిస్తూ దేశ సర్వోన్నత న్యాయస్థానం సుప్రికోర్టు ఆదేశాలు జారీ చేసింది. ఈ కేసులో నిందితులు, సాక్షులతో పాటు ప్రత్యక్షంగా, పరోక్షంగా సంబంధమున్న సుమారు 49 మంది అసహజ మరణాలకు గురికావడంతో వారి మరణాలను కూడా సిబిఐ దర్యాప్తు చేయాలని అత్యున్నత న్యాయస్థానం అదేశాలు జారీ చేసింది. మధ్యప్రదేశ్ హైకోర్టు ఈ కేసు విషయంతో సిబిఐ విచారణకు అదేశించకుండా తమపై భారాన్ని వేయడాన్ని కూడా సుప్రీంకోర్టు తప్పబట్టింది.

ఈ కేసులో మధ్యప్రదేశ్ రాష్ట్ర గవర్నర్ రాం నరేశ్ యాదవ్ పై చర్యలు ఎందుకు తీసుకోలేదని కూడా అత్యున్నత న్యాయస్థానం ప్రశ్నించింది. ఈ కేసు దర్యాప్తును తాము స్వయంగా పర్యవేక్షిస్తామని సుప్రీంకోర్టు తెలిపింది. ఈ కేసుకు సంబంధించి మద్యప్రదేశ్ ప్రభుత్వానికి, గవర్నర్, కేంద్ర ప్రభుత్వానికి సుప్రీంకోర్టు నోటీసులను జారీ చేసింది. నాలుగు వారాల్లో సమాధానం చెప్పాలని ఆదేశించింది. తదుపరి విచారణను ఈనెల 24లోగా ప్రాధ్యమిక సమాచారం ఇవ్వాలని సిబిఐని అదేశించిన సర్వోన్నత న్యాయస్థానం.. ఈ కేసును తదుపరి విచారణను 25కు వాయిదా వేసింది. వ్యాపం కుంభకోణంపై సీబీఐ విచారణ కోరుతూ దిగ్విజయ్‌సింగ్, కుమార్ విశ్వాస్ సహా 9 పిటిషనన్లు దాఖలు చేయగా, కాంగ్రెస్ నేత, మాజీ కేంద్ర మంత్రి కపిల్ సిబల్ సుప్రీకోర్టులో పిటీషనర్ల తరపున వాదనలు వినిపించారు.

జి మనోహర్