రాజకీయాల్లో ఎంట్రీ ఇవ్వనున్న ‘స్మగ్లర్’ నటి

Posted: 06/04/2015 10:31 AM IST

వెండితెరపై ఓ వెలుగు వెలిగిన నటీనటులు.. ఆ తర్వాత సినీఫక్కీలో తమ కెరీర్ సాఫీగా సాగని క్రమంలో వ్యాపార, రాజకీయ లేదా ఇతర రంగాల్లో అడుగిడుతుంటారు. కనీసం ఆ రంగాల్లోనైనా లాభార్జన పొందవచ్చునని లేదా తమను తాము మరింత పాపులర్ చేసుకోవచ్చన్న ఉద్దేశంతో వాటిపై దృష్టి సారిస్తుంటారు. ఇప్పటికే ఎందరో నటీనటుల్లో కొందరు వ్యాపారం రంగంలోనూ, మరికొందరు రాజకీయాల్లోనూ తమ స్థానం పదిలపర్చుకున్నారు. ఇంకొంతమంది రాజకీయాల్లో తమ అదృష్టాన్ని పరీక్షించుకోవడం కోసం సన్నద్ధమవుతున్నారు. ఈ క్రమంలోనే మరో సినీనటి రాజకీయాల్లో రంగప్రవేశం చేసేందుకు సమాయత్తమవుతోందని సమాచారం!

ప్రముఖ శాండల్వుడ్ నటి ప్రియా హాసన్ త్వరలోనే రాజకీయాల్లోకి రానుంది. యాక్షన్ చిత్రాల ద్వారా శాండల్వుడ్లో తనదైన ముద్ర వేసిన ఈమె... ‘బిందాస్ హుడుగి’, ‘జంభద హుడుగి’ చిత్రాల ద్వారా కన్నడ ప్రేక్షకులకు చేరువైంది. ఇండస్ట్రీలో తనకంటూ ప్రత్యేక గుర్తింపు సాధించిన ఈ నటి.. తాజాగా ‘స్మగ్లర్’ అనే చిత్రంలో నటించింది. ఆ చిత్రం షూటింగ్ పూర్తిచేసుకుని విడుదలకు సిద్ధంగా ఉంది. అయితే.. ఈమె దృష్టి రాజకీయాలవైపు మళ్లిన నేపథ్యంలో అందులో రంగప్రవేశం చేయాలని నిర్ణయించుకుంది. ఈ క్రమంలోనే ఈ నటి.. బృహత్ బెంగళూరు మహానగర పాలికె (బీబీఎంపీ) ఎన్నికల్లో పోటీ చేసేందుకు సిద్ధమవుతోంది. ఈ ఎన్నికల ద్వారా ఆమె ద్వారా రాజకీయాల్లోకి ప్రవేశించేందుకు ఆమె సన్నద్ధం అవుతోంది. కాంగ్రెస్ పార్టీ తరపున ప్రియా హాసన్ బీబీఎంపీ ఎన్నికల్లో పోటీ చేయనున్నట్లు సమాచారం.

ఇదిలావుండగా.. రమ్య, పూజాగాంధీ, రక్షిత తదితర కన్నడ చిత్ర పరిశ్రమకు చెందిన నటీమణులు ఇప్పటికే రాజకీయాల్లో ఉన్న విషయం తెలిసిందే. ఈ ముగ్గురూ గత ఎన్నికల్లో వివిధ పార్టీల తరపున పోటీ చేసి పరాజయం పొందారు. మరి.. ఇప్పుడు ప్రియా హాసన్ విజయం దక్కించుకుంటుందా..? లేదా..? అన్నది వేచి చూడాల్సిందే!