ఏ పాపం తెలియకున్నా.. నిందితురాలిని చేశారు.. నీతూ

Posted: 05/07/2015 03:13 PM IST

ఎర్రచందనం స్మగ్లింగ్ కేసుతో అభియోగాలు ఎదుర్కోని అరెస్టు అయిన నటి నీతు అగర్వాల్ ఈ కేసుతో తనకు ఎలాంటి సంబంధం లేదని పునరుద్ఘాటించారు. ఈ కేసులో న్యాయస్థానం బెయిల్ మంజూరు చేయడంతో బయటకు వచ్చిన నీతు అగర్వాల్.. గురువారం కర్నూలులో  మీడియాతో మాట్లాడారు. మస్తాన్ వలీ జైలు నుంచి బయటకు వచ్చిన తర్వాత ఈ విషయంలో తాడోపేడో తేల్చుకుంటానని నీతూ అగర్వాల్ అన్నారు. మస్తాన్ వలీ తనకు ఒక రియాల్టర్, నిర్మాతగానే తనకు తెలుసునని ఆమె తెలిపారు. అంతకు మించి అతడి గురించి తనకేమీ తెలియదన్నారు.

ఇద్దరం కలసి ప్రేమ ప్రయాణం చిత్రంలో కలిసి నటించామని... ఆ తర్వాత తమ మధ్య ప్రేమ చిగురించి వివాహం చేసుకున్నామని వెల్లడించారు. అయితే అతను ఎక్కడి నుంచి వచ్చాడు... సినీ రంగానికి ఎలా వచ్చాడు... అనే అంశాలపై మస్తాన్ వలీని  తాను ఏ రోజు ప్రశ్నించలేదన్నారు. ఇంతకు మించి తనకు మస్తాన్ గురించి ఏమీ తెలియదన్నారు. గతంతో తాను మస్తాన్ పై చేసిన అరోపణలన్నింటికీ కట్టుబడి వున్నట్లు చెప్పారు. మస్తాన్ వలి తనను మానసికంగా, శారీరికంగా హింసించాడని చెప్పారు. తన ఏటీఎమ్ కార్డు కావాలని ఓ భర్తగా మస్తాన్ అడిగాడని.. భార్యగా తాను ఇచ్చానని ఆమె చెప్పారు. తన ఏటీఎం కార్డును మస్తాన్ దుర్వినియోగం చేశారని ఆరోపించారు.

అనవసరంగా తనను ఈ కేసులో ఇరికించారని ఆమె ఆవేదన వ్యక్తం చేశారు. పోలీసులు ఆరోపిస్తున్నట్లు తాను ఎవరిని మోసం చేయలేదన్నారు. తాను ఏ తప్పు చేయలేదని... భవిష్యత్తులో తప్పకుండా సినిమా అవకాశాలు వస్తాయని నీతూ అగర్వాల్ ఆశాభావం వ్యక్తం చేశారు. అయితే ఈ కేసుతో నటి నీతూ అగర్వాల్ కు ఎలాంటి సంబంధం లేకున్నా.. కావాలని అమెను ఇరికించి.. ఎర్రచందనం స్మగ్లర్ల ఎన్ కౌంటర్ తో ఇంటాబయటా విమర్శల పాలవుతున్న పోలీసులు.. ఈ ఘటనతో విమర్శలకు ఫుల్ స్టాప్ పెట్టేందుకు ప్రయత్నించారన్న అనుమానాలు కూడా పలువురిలో వ్యక్తమవుతున్నాయి

జి. మనోహర్