స్టోర్ రూమ్ గా మారిన కోర్టు హాలు..

Posted: 02/20/2015 03:17 PM IST

కర్ణాటకలోని మైసూర్ కోర్టు హాలు.. గత తొమ్మిది నెలలుగా మూసివుంది. స్వయంగా న్యాయదేవత కొలువైన పవిత్రస్థలంలో ఓ కోర్టు హాలు మూసివేయడం ఏంటని సందేహం కలుగుతుందా..? అవునండి ఈ కోర్టు హాలులో దెయ్యం సంచరిస్తుందనే పుకార్ల హల్చల్ చేయడంతో కోర్టు హాలు మూసివేశారు. గత ఏడాది మే నెలలో మూతబడిన సదరు కోర్టు హాలును ఇప్పటికీ తెరవొద్దంటూ న్యాయవాదులు డిమాండ్ చేస్తున్నారు. అయితే మరికొందరు లాయర్లు మాత్రం వారితో విభేదిస్తున్నారు.  న్యాయవాదులు రెండు గ్రూపులుగా విడిపోయి ఇదే విషయంలో పరస్పరం వాదనలకు దిగుతున్నారు. దీంతో ఆ కోర్టు హాలును తెరిచే సాహసం ఎవరూ చేయడం లేదు.

ఎన్నో సంచలనాత్మకమైన తీర్పులను వెలవరించిన కోర్టు హాలు ప్రస్తుతం స్టోర్ రూమ్ గా మారిపోయింది. ఎందకంటే గతంలో ఇదే కోర్టులో న్యాయమూర్తిగా పనిచేసిన వ్యక్తి రోడ్డు ప్రమాదంలో చనిపోయి దెయ్యమై అందులో సంచరిస్తున్నాడనే పుకార్లతో ఆ హాలును గత ఏడాది మే నెలలో మూసివేశారు. ప్రస్తుతం ఇందులో విరిగిపోయిన బల్లలు, కుర్చీలు వేసి స్టోర్ రూమ్గా వాడుతున్నారు. ఎన్నో ముఖ్యమైన కేసుల వాదనలకు ప్రముఖ న్యాయమూర్తులు, న్యాయవాదులకు నెలవుగా నిలిచిన ఆ కోర్టు హాలు... మూఢనమ్మకాల కారణంగా మూతపడింది. అన్నింటికీ ఆధారలే ముఖ్యమనే మన న్యాయవ్యవస్థ కోవిదులు కూడా దెయ్యం అంటే భయం అంటూ మూసివేయించడం గమనార్హం.

జి.మనోహర్