‘గోపాల గోపాల’పై బాలయ్య, టీడీపీ ఫ్యాన్స్ క్రేజ్

Posted: 01/10/2015 11:26 AM IST

పవర్ స్టార్ పవన్ కళ్యాణ్ మరోసారి రికార్డుల దుమ్ము దులుపుతున్నాడు. తాజాగా విడుదలైన ‘గోపాల గోపాల’ సినిమా సక్సెస్ దిశగా రాకెట్ వేగంతో దూసుకెళ్ళటం ఖాయంగా తెలుస్తోంది. ఉదయం ఆటకు ముందే చాలా చోట్ల ప్రీమియర్, బెనిఫిట్, మిడ్ నైట్ షోలు ప్రదర్శించారు. తొలి షో సినిమా చూసిన అభిమానులు పవన్ ఫీవర్ లో మునిగిపోయారు. భజే భాజే అంటూ ఉర్రూతలూగుతున్నారు. థియేటర్లోనే సంక్రాంతి సంబరమంతా కన్పిస్తోంది. సినిమాలో పవన్ రోల్ తక్కువ సమయం ఉన్నప్పటికీ... ఫ్యాన్స్ మాత్రం సినిమాకు బ్రహ్మరథం పడుతున్నారు. ఒక విధంగా చెప్పాలంటే సినిమాకు వెంకటేష్ ఫ్యాన్స్ కంటే పవన్ అభిమానుల కోలాహలమే ఎక్కువగా ఉంది. ఆయన అభిమానుల వల్లే ఇంత హిట్ టాక్ పొందుతోంది అనటంలో ఏ మాత్రం అతిశయోక్తి లేదు.

ఇక్కడ మరో ఆశ్చర్యకరమైన టాక్ విన్పిస్తోంది. పవన్ సినిమా టికెట్ల కోసం టీడీపీ కార్యకర్తలు ముఖ్యంగా బాలయ్య ఫ్యాన్స్ అయితే చాలా కష్టపడుతున్నారట. కృష్ణా, గుంటూరు జిల్లాలతో పాటు కోనసీమ ప్రాంతంలో బాలయ్య ఫ్యాన్స్ టికెట్ల కోసం పెద్ద ఎత్తునే పైరవీలు చేస్తున్నారట. తొలి మూడు రోజులకు టికెట్లన్నీ బుక్ కావటంతో ఎలాగైనా సినిమా చూసేందుకు అవకాశం కల్పించాలని డిస్ర్టిబ్యూటర్లు, తెలిసిన పెద్దలను కలుస్తున్నారట. ఇంకొందరయితే తమ పలుకుబడి ఉపయోగించి ఏకంగా నిర్మాత సురేష్ బాబును సంప్రదిస్తున్నారని తెలుస్తోంది.

2014 సార్వత్రిక ఎన్నికల్లో పవన్ బీజేపీ-టీడీపీ కూటమికి మద్దతు ప్రకటించారు. ఈ కూటమి తరపున ప్రచారం కూడా చేశారు. దీంతో టీడీపీ ఎమ్మెల్యే, హీరో బాలకృష్ణ ఫ్యాన్స్ కు కూడా పవన్ అంటే సాఫ్ట్ కార్నర్ ఉంది. దీంతో పవన్ సినిమాపై వీరికి కూడా క్రేజ్ ఏర్పడింది. ఇండస్ర్టీ అంతా కులం, వర్గం, ప్రాంతం అంటూ విడిపోయిన సమయంలో ఒక హీరో సినిమా కోసం మరో హీరో అభిమానులు పైరవీ చేయటం అంటే అది పవన్ కే చెల్లింది. హ్యాట్సాఫ్ అటు పవర్ స్టార్.