Posted: 03/14/2013 10:40 AM IST

ఈ రోజు శాసనసభలో తెరాస సభ్యులు తెలంగాణా గురించి సభలో చర్చిస్తూ సభాపతి దగ్గరకు పోయి ఆందోళన కొనసాగించటంతో సభ గంట సేపు వాయిదా పడింది.  సభ్యులను సభను సజావుగా సాగించేందుకు సహకరించమని సభాపతి చేసిన విఙప్తి ని వారు వినకపోవటంతో సభ వాయిదా వెయ్యవలసివచ్చింది.  

విపక్షాలు అవిశ్వాస తీర్మానం దిశగా కదుపుతున్న పావులను గమనించిన ముఖ్యమంత్రి అక్కడ అందుబాటులో ఉన్న మంత్రులతో మంతనాలు జరిపారు.  

భారతీయ జనతా పార్టీ, కమ్యూనిస్ట్ పార్టీలు, నాగం జనార్దన రెడ్డి తో కలిసి తెలంగాణా రాష్ట్ర సమితి మొత్తం 25 సంతకాలతో కూడిన అవిశ్వాస తీర్మానం నోటీసుని సభాపతికి అందజేసింది.  

ఈ విషయంలో మాట్లాడుతూ ఈటెల రాజేందర్, ధరల నియంత్రణలోనూ విద్యుత్ సరఫరా లోనూ ప్రభుత్వ వైఫల్యం వలన సామాన్య ప్రజలు ఇక్కట్ల పాలవుతున్నారని, ఈ ప్రభుత్వానికి పాలించే హక్కు లేదని, అందువలన ప్రభుత్వాన్ని పడగొట్టేందుకు అన్ని శక్తులనూ వొడ్డి ప్రయత్నిస్తామని చెప్తూ, ఇందులో తెలుగు దేశం పార్టీకూడా తోడుగా ఉంటే చాలా బావుండేదని, రాజకీయ దృష్టితో ఆలోచించకుండా తెలుగుదేశం పార్టీ సహకరించాలని కోరుకుంటున్నానని ఆయన అన్నారు. 

వాయిదా పడ్డ సభ 10 గంటలకు తిరిగి ప్రారంభమైంది.

-శ్రీజ