Posted: 01/09/2013 11:10 AM IST

 కాంగ్రెస్ కార్యకర్త హత్యకేసులో గురజాల టీడీపీ ఎమ్మెల్యే యరపతినేని శ్రీనివాసరావును పోలీసులు అరెస్టు చేశారు. గత కొంతకాలంగా అజ్ఞాతంలో ఉన్న ఆయనను ఎట్టకేలకు పోలీసులు అదుపులోకి తీసుకున్నారు. యరపతినేనిని గుంటూరు జిల్లా పిడుగురాళ్ల పోలీస్‌స్టేషన్‌కు తరలించారు. ఆయనపై రెండు నాన్ బెయిలబుల్ సెక్షన్ల కింద పోలీసులు కేసు నమోదు చేశారు. పోలీసులు ఈరోజు ఉదయం యరపతినేనిని పిడుగురాళ్ల న్యాయమూర్తి ఎదుట హాజరుపరిచారు. న్యాయమూర్తి ఆయనకు 14 రోజుల రిమాండ్ విధించారు. అనంతరం గుంటూరు జిల్లా జైలుకు తరలించారు. దీంతో ఎమ్మెల్యే అరెస్టుకు నిరసనగా గురజాల బంద్‌కు టీడీపీ నేతలు పిలుపునిచ్చారు. కాగా కావాలనే తనను ఈ కేసులో ఇరికించారని యరపతినేని ఆరోపించారు. ప్రభుత్వం కక్షకట్టి ప్రతిపక్ష ఎమ్మెల్యేలపై అక్రమ కేసులు బనాయిస్తుందని ఆయన వ్యాఖ్యానించారు.  కాంగ్రెస్ నేత హత్య కేసులో అరెస్టు అయిన టీడీపీ ఎమ్మెల్యే యరపతినేని శ్రీనివాసరావు మీడియాతో మాట్లాడారు. ఎమ్మెల్సీ టీజీవీ కృష్ణారెడ్డి ప్రోద్భలంతోనే తనపై తప్పుడు కేసు నమోదైందని తెలిపారు. న్యాయపోరాటం చేస్తా.. నిర్దోషిగా బయటకు వస్తానని ఆయన ధీమా వ్యక్తం చేశారు. ప్రస్తుతం యరపతినేని గుంటూరు జిల్లా సబ్ జైలులో ఉన్నారు.