Posted: 08/30/2012 11:48 AM IST

ఒబామా సర్కారును కూల్చేసి.. ఆయనను అంతం చేసేందుకు కుట్ర జరిగిందా? అమెరికా సైనికుల్లోనే కొందరు ఇందుకు సిద్ధపడ్డారా? అవుననే అంటున్నారు ముగ్గురు సైనికులు. జార్జియా కోర్టులో హత్యకేసు విచారణ సందర్భంగా ఐజాక్ అగీగు, ఆంథోనీ పెడెన్, క్రిస్టోఫర్ సాల్మన్ ఈ గుట్టు విప్పారు. అధ్యక్షుడు ఒబామాను అంతం చేసి అస్థిరత్వం సృష్టించాలన్న లక్ష్యంతో కొందరు సైనికులు అరాచక ప్రైవేటు సైన్యంగా ఏర్పడ్డారు.'ఫరెవర్ ఎండ్యూరింగ్ ఆల్వేస్ రెడీ(ఫియర్)' పేరిట ఏర్పాటైన ఈ కూటమి దాదాపు రూ.50 లక్షలు వెచ్చించి ఆయుధాలనూ సిద్ధం చేసుకొంది. కుట్రలో భాగంగా ఓ ఆనకట్టను పేల్చేయడం వంటి విధ్వంసాలకు ప్రణాళిక రచించింది. అలాగే జార్జియాలోని ఫోర్ట్ స్టివార్ట్ సైనిక స్థావరం నుంచి ఆయుధ మందుగుండును ఎత్తుకెళ్లే ఆలోచన చేసింది. ఓ మాజీ సైనికుడు, ఆయన ప్రియురాలి హత్యల కేసులో పట్టుబడిన ఆ ముగ్గురు సైనికులు ఈ గుట్టంతా విప్పారు. గత డిసెంబర్‌లో జార్జియాలో ఈ హత్యలకు పాల్పడ్డారు.