Posted: 07/19/2012 04:32 PM IST

భారత్‌లోని అధిక శాతం మంది ఉద్యోగులు తాము పని చేసే ప్రదేశంలో మంచి సహచరులు ఉండటంతోపాటు ఉద్యోగ భద్రత ఉండాలని కోరుకుంటున్నట్టు తాజా సర్వేలో వెల్లడైంది. ఇలాంటి పరిస్థితి ఉండే సంస్థలో జీతం కోసం రాజీ పడటానికి కూడా సిద్ధపడుతున్నట్టు హెచ్ఆర్ సర్వీసుల సంస్థ రాండ్‌స్టడ్ సర్వేలో తేలింది. ఈ సంస్థ దేశంలో సర్వే జరిపిన ఉద్యోగుల్లో 82 శాతం మంది ఉద్యోగులు మంచి సహచరులను కోరుకుంటున్నారు. ఇలాంటి అభిప్రాయం వ్యక్తమైన దేశాల్లో భారత్ రెండో స్థానంలో ఉండగా చైనా మొదటి స్థానంలో ఉంది. కాగా ఉద్యోగ వాతావరణంతో పాటు జీతం కూడా ముఖ్యమేనని 68 శాతం మంది అంటున్నారు. ఇది ప్రపంచ సగటు 60 శాతంకన్నా అధికం కావడం విశేషం. 32 దేశాల్లో రాండ్‌స్టడ్ ఈ సర్వేను చేపట్టింది. ప్రతి దేశంలోనూ 400 ఆన్‌లైన్ ఇంటర్వ్యూల ద్వారా అభిప్రాయాలను సమీకరించింది. కాగా ఉద్యోగులు తమ జీవిత కాలంలో కీలక సమయాన్ని పని చేసే ప్రదేశంలోనే గడుపుతుంటారు. ఇలాంటి పరిస్థితిలో జీతమే అన్ని సంతోషాలను ఇవ్వకపోవచ్చు. పని ప్రదేశంలో సంతృప్తికరమైన వాతావరణాన్ని కల్పించడం హెచ్ఆర్ మేనేజర్ల బాధ్యతని రాండ్‌స్టడ్ ఇండియా మేనేజింగ్ డైరెక్టర్, సిఇఒ ఇ బాలాజీ పేర్కొన్నారు.