Posted: 06/10/2012 07:07 PM IST

      చంద్రబాబు లాంటి అవినీతిపరుడు లేనేలేడంటున్నారు జగన్ పార్టీనేతలు. వైఎస్ఆర్ సీపీ నేతలంతా ఇవాళ ముక్తకంఠంతో బాబుపై దుమ్మెత్తిపోశారు.  కోలా కృష్ణ మోహన్ చేసిన ఆరోపణలకు సంబంధించి టిడిపి అధ్యక్షుడు చంద్రబాబు నాయుడు తన నిజాయితీ నిరూపించుకోవాలని వైఎస్ఆర్ కాంగ్రెస్ పార్టీ నేత జూపూడి ప్రభాకర రావు డిమాండ్ చేశారు. పార్టీ కేంద్ర కార్యాలయంలో ఈరోజు ఆయన విలేకరులతో మాట్లాడారు. సిబిఐ, ఇడి విచారణకు ఆయన సిద్దపడాలన్నారు. ఖాతాల నెంబర్లతో సహా బయట పెట్టిన చంద్రబాబు నాయుడు విదేశీ బ్యాంకు ఖాతాల గురించి కాంగ్రెస్  వారు ఎందుకు మాట్లాడటంలేదని ఆయన ప్రశ్నించారు. సింగపూర్ లో ఉన్న బ్యాంకు పేరు, ఖాతా నెంబరు కూడా కోలా ఇచ్చారని తెలిపారు. చంద్రబాబు నాయుడు ఇక్కడ దోచుకొని విదేశీ బ్యాంకులలో దాచుకున్న విషయాన్ని ఈరోజు కోలా బయట పెట్టాడన్నారు. బాబు కుటుంబంలో ఒక వ్యక్తిగా ఉన్న కోలా ఆయన వ్యవహారం, వారి అబ్బాయి బాగోతం బయటపెట్టారని తెలిపారు. కోలా ఆరోపణలకు చంద్రబాబు సమాధానం చెప్పాలని ఆయన డిమాండ్ చేశారు.
     భారతదేశంలోనే చంద్రబాబు లాంటి అవినీతిపరుడు ఎవరూ లేడని వైఎస్ఆర్‌ కాంగ్రెస్‌ పార్టీ నేత నల్లపరెడ్డి ప్రసన్నకుమార్‌ రెడ్డి చెప్పారు. కోలా కృష్ణమోహన్ ఆరోపణలకు బాబు సమాధానం చెప్పాలని ఆయన డిమాండ్ చేశారు. దమ్ముంటే సీబీఐ చేత బాబు విచారణ చేయించుకోవాలని నల్లపరెడ్డి ప్రసన్నకుమార్‌ రెడ్డి సవాల్ విసిరారు .
      అన్నాహజారే వారసుడని చెప్పుకోవటం కాదని... చంద్రబాబు తనపై వచ్చిన ఆరోపణలకు సమాధానం చెప్పాలని పోలవరం వైఎస్ఆర్ కాంగ్రెస్ పార్టీ అభ్యర్థి తెల్లం బాలరాజు డిమాండ్ చేశారు. చంద్రబాబుకు వైఎస్ కుటుంబం గురించి మాట్లాడే హక్కు లేదన్నారు. కోలా చేసిన ఆరోపణలపై బాబు నోరు విప్పాలన్నారు. ఎన్నికల్లో కాంగ్రెస్, టీడీపీకి ఓటర్లే తగిన బుద్ధి చెబుతారని బాలరాజు అన్నారు.
     కోలా కృష్ణమోహన్ ఆరోపణలపై చంద్రబాబు విచారణకు అంగీకరిస్తే బాబు అవినీతి బయటకు వస్తుందని వైఎస్ఆర్ కాంగ్రెస్ పార్టీ అధికార ప్రతినిధి అంబటి రాంబాబు అన్నారు. కోలా చెప్పిన అకౌంట్లు తనవి కావాని చంద్రబాబు అంగీకరించగలడా అని ఆయన ఆదివారమిక్కడ విలేకర్ల సమావేశంలో సూటిగా ప్రశ్నించారు.

...avnk