Posted: 04/19/2012 10:47 AM IST

వైఎస్సార్ కాంగ్రెస్ పార్టీని ఆది నుంచి అంటిపెట్టుకుని ఉన్న కొండా సురేఖ.. తెలంగాణ కోసమే రాజీనామా చేశానని చెపుతున్నప్పటికీ అక్కడి ప్రజలు మాత్రం ఆమెను విశ్వసించడం లేదన్నది తెరాస, భాజపాల వాదన. కనుక కొండా సురేఖ గెలుపన్నది అంత సుళువైన విషయం కాదన్నది తేటతెల్లమే. ఎన్నో తర్జనభర్జనల అనంతరం పరకాల ఉపఎన్నికలో తెరాస పోటీకి దిగుతుందని టీఆర్ఎస్ ప్రకటించింది. దీంతో ఈ ఎన్నిక రసవత్తరంగా మారనుంది. జగన్ పార్టీలో కీలక సభ్యురాలుగా ఉన్న కొండా సురేఖ ఇక్కడి నుంచి స్వతంత్ర అభ్యర్థిగా పోటీ చేస్తున్నప్పటికీ ఆమె అనధికారికంగా వైఎస్సార్ కాంగ్రెస్ పార్టీ తరపునే పోటీ చేస్తున్నట్లు అనుకోవాల్సిందే. ఈ నేపధ్యంలో గెలుపు ఎవరిని వరిస్తుందన్న దానిపై పలు రకాల వాదనలు వినబడుతున్నాయి.

తెలంగాణ సెంటిమెంట్ కార్డుతో ఈ స్థానం నుంచి ఎలాగైనా గెలిచి పరువు నిలబెట్టుకోవాలని తెరాస ఈసరికే కసరత్తు ప్రారంభించింది. ఐతే మహబూబ్ నగర్ లో తెరాసకు గట్టి షాకిచ్చి విజయంతో ఉరకలు వేస్తున్న భాజపా మాత్రం పరకాలలో పాగా వేయడానికి ఎప్పుడో ప్రచారం మొదలెట్టేసింది. తెలంగాణ తెచ్చే సత్తా.. చిత్తశుద్ధి తమ పార్టీకే ఉన్నాయని భాజపా అక్కడి ప్రజలకు చెపుతోంది.