Posted: 02/15/2012 11:56 AM IST

హైద్రాబాద్ కి చెందిన ప్రవీణ్ రెడ్డి మీద జరిగిన మన దేశస్తుల హత్యాప్రయత్నం ఇంకా మర్చిపోనేలేదు, సింగపూర్ లో జరిగిన మరో హత్య బయటపడింది. తమిళనాడు తిరుచురాపల్లికి చెందిన 20 సంవత్సరాల పెరియాస్వామీ దేవరాజన్ 31 సంవత్సరాల రాజు అరివళగన్ ని ఫిబ్రవరి 8 న హత్య చేసిన నేరం మీద అరెస్ట్ చేసారు. అతని మీద కేసు నడిచి నేరం రుజువైనందు వలన దేవరాజన్ కి సింగపూర్ న్యాయం ప్రకారం మరణ శిక్షను విధించారు.

ఎల్లలు, సాగరాలు దాటినా పొట్టకూటి కోసమో విద్యార్జన కోసమో విదేశాలకు పోయినా అక్కడా సఖ్యత లేని మన దేశవాసుల మధ్య వైషమ్యాలు ఒకరినొకరు చంపుకునే స్థితికి రావటం నిజంగా దౌర్భాగ్యమే.

తెలిసినవారిమీదనే కోపాలు, ఆవేశాలు, ఈర్ష్యలు, అసూయలు ఉండటం విచిత్రం. ఎవరో ముక్కూ ముఖం తెలియనివాళ్ళు సంపదల్లో తులతూగుతున్నా, ఐశ్వర్యంలో మునిగి తేలుతున్నా పెద్దగా పట్టించుకోం కానీ బాగా తెలిసినవాడి ప్రగతిని సాటివారి అభివృద్ధిని జీర్ణించుకోవటం కాస్త కష్టంగానే ఉంటుంది. ఈర్ష్యాసూయలు దగ్గరి వారి మీదనే ఎక్కువగా ఉండటం మానవుల వింత ప్రవర్తన. దేశంలో ఎంతో మంది పోటీపరీక్షల్లో హాజరవుతున్నా, తన తరగతిలో ఉన్న సహవిద్యార్ధి తనకంటే ముందుకి పోవటం సహించలేక ప్రత్యక్షపరోక్ష విధానాల్లో వారికి అడ్డంకులు కలిగించటం, వారి మీద కసి తీర్చుకోవటం ఎన్నో సందర్భాల్లో వార్తల్లోకి వస్తుంటాయి. సహనం, సద్భావన, సహజీవనం రానంత వరకూ మానవాళి ఇలాంటి పరిస్థితులను ఎదుర్కోవటం జరుగుతూనేవుంటుంది.

-శ్రీజ