Posted: 02/09/2012 12:39 PM IST

మాల్దీవ్స్ వ్యవహారంలో భారత్ తటస్థంగా వ్యవహరించింది. ఇది మాల్దీవ్స్ అంతర్గత వ్యవహారమని, ఆ దేశమే దాన్ని పరిష్కరించుకుంటుందని భారత్ ప్రకటించింది.

నిజానికి మంగళవారమే పోలీసు తిరుగుబాటు జరుగుతున్నట్టుగా సమాచారం అందిన సందర్భంగా భారత్ జోక్యాన్ని అప్పటి అధ్యక్షుడు మహమ్మద్ నషీద్ కోరారు. కానీ భారత్ ఈ విషయంలో ఎటువంటి చర్యా తీసుకోలేదు. భారత్ కి చెందిన గన్ బోట్లు కనిపించాయని, మాల్దీవ్స్ సంక్షోభంలో అవి కలుగజేసుకుంటాయని ఆశించామని నషీద్ సహచరులు తెలియజేసారు. కానీ వారంతా ఇప్పుడు అరెస్ట్ భయంతో తలదాచుకునివున్నారు. రాజకీయ సంక్షోభం తలెత్తిన సందర్భంలో మాలె విదేశాంగ మంత్రి అక్కడి భారత్ దౌత్య కార్యాలయంలో తలదాచుకున్నారని విశ్వసనీయ వర్గాల నుంచి వచ్చిన సమాచారం.

1988 లో శ్రీలంకలోని తమిళ ఖైదీల సాయంతో లత్ఫీ అనే ఒక వ్యాపారి అప్పటి అధ్యక్షుడు అబ్దుల్ గయూమ్ ప్రభుత్వాన్ని కూలదోయటానికి ప్రయత్నించగా అప్పడు భారత్ నేవీ, ఆర్మీ కూడా ఆపరేషన్ కాక్టస్ పేరుతో మాల్దీవ్స్ లో కలుగజేసుకుంది. అటువంటి పరిస్థితి ఈసారి పునరావృతం కాలేదు. దానికి తటస్థ విధానమొకటే కాకుండా, దేశంలో ప్రస్తుతమున్న రాజకీయ సంక్షోభానికి ప్రభుత్వం మరోదాన్ని జోడించే పనికి దూరంగా ఉందని రాజకీయ విశ్లేషకులు అంటున్నారు.

ప్రత్యక్ష సాక్షుల కథనం ప్రకారం నషీద్ తలకి తుపాకి గురిపెట్టి ఆయనతో రాజీనామా చేయించారు. రక్తపాతం లేకుండా జరిగిన ఈ పోలీసు తిరుగుబాటుతో తెల్లవారికల్లా మొహమ్మద్ వహీద్ హసన్ మాల్దీవ్స్ కి అధ్యక్షులయ్యారు. అయితే నషీద్, అతని అనుచరుల ప్రాణభయంతో ఉన్నారు. ప్రభుత్వ సలహాదారుడు జాకీని, మరో ఇద్దరు పార్లమెంటు సభ్యులను కొట్టారని, వారి జాడ ఇంకా తెలియటం లేదని నషీద్ గుప్త స్థలంలో తలదాచుకుంటున్న సహచరులు అంటున్నారు.

-శ్రీజ