Posted: 12/28/2011 03:31 PM IST

తెదేపా తెలంగాణా ఫోరం నేత మోత్కుపల్లి నరసింహం, తెరాస అధ్యక్షుడు కెసిఆర్ మధ్య అగాధం బాగా పెరిగిపోతోంది. మోత్కుపల్లి మాటలను తెరాస నేతలు తీవ్రంగా ఖండిస్తున్నారు. ఈ రోజు మోత్కు పల్లి కెసిఆర్ భండారమంతా బయటపెడతానని ప్రకటిస్తున్నారు. గన్ పార్క్ దగ్గర నిరసన చేయబోనిన మోత్కుపల్లిని ఉదయఁ పోలీసులు అడ్డుకున్నారు. అయితే ఆయన మీడియా ముందు కెసిఆర్ మీద తన ఆరోపణలనన్నిటినీ వెలిబుచ్చారు.

కెసిఆర్ నిజానికి తెలంగాణా ప్రాంతానికి చెందినవారు కాదని, విజయనగరం ప్రాంతం నుంచి వచ్చినవారని, కరీం నగర్ కి వలస వచ్చిన చంద్రశేఖర్ దొంగ పాస్ పోర్టులు అమ్ముకుంటూ కాలక్షేపం చేసేవారని, అందుకే ఇప్పటికీ కెసిఆర్ ని దుబాయ్ చంద్రశేఖర్ అని అంటారని మోత్కుపల్లి అన్నారు.

తెలంగాణా సెంటిమెంటుతో కెసిఆర్ అమాయకులతో ఆడుకున్నారని, తెలంగాణా కోసం బలిదానం చేసినవారిమీద కెసిఆర్ కి ఎటువంటి సానుభూతీ లేకపోగా వారి కుటుంబాలను నీచంగా చూస్తున్నారని మోత్కుపల్లి ఆరోపించారు.

దీక్ష అనేది కెసిఆర్ నాటకమేనని, అందుకు సాక్ష్యాధారాలు తన దగ్గరున్నాయని చెప్తూ మోత్కుపల్లి నిమ్స్ లెటర్ హెడ్ మీద రాసున్న నివేదికను మీడియా కెమేరాల ముందు పెట్టి అందరికీ చూపించారు. కెసిఆర్ నిమ్స్ లో ఫ్లూయిడ్స్ ఎక్కించుకుని దొంగతిండి తింటూ నిరాహార దీక్ష చేసినట్టుగా నాటకాలాడారని, అటువంటి దీక్షలు ఎవరైనా ఎన్నిరోజులైనా చెయ్యవచ్చని మోత్కుపల్లి ఎద్దేవా చేసారు.

-శ్రీజ